30 vjetori i pavarësisë e gjeti shtetin me një shoqëri multietnike dhe mulfikonfesionale, e hapur me fqinjët e saj, e integruar në NATO dhe me aspirata drejt BE-së. Kështu e vlerëson këtë jubile ministri i jashtëm, Bujar Osmani, i cili si arritjet më të mëdha diplomatike por edhe të brendshme, potencoi marrëveshjet me fqinjët dhe marrëveshjen e Ohrit. Por, Osmani është i vetëdijshëm se rrugëtimi i RMV-së drejt BE-së kalon përmes Sofjes, por komunikimi aktualisht është vështirësuar, edhe për shkak të situatës politike atje.
“Ne e dimë që rruga jonë drejt BE-së këtë herë kalon përmes Sofjes, ne vazhdojmë komunikimin. U pajtuam që të kemi një vazhdimësi të takimeve në nivel ekspertësh të vetëdijshëm se pa një qeveri politike në Bullgari askush nuk mund të parashikojë nëse do të ketë një vendim, por unë kërkova të vazhdoj komunikimin në mënyrë që ndërkohë të përpiqemi të kapërcejmë disa dallime. Jam i kënaqur kur shoh se si sllovenët janë aktivë, BE, ne jemi gjithashtu aktivë. Ne do të bëjmë gjithçka të nevojshme brenda pozicioneve të shtetit. 26 shtete anëtare të BE-së besojnë se ne po sillemi në mënyrë konstruktive, me dinjitet dhe na inkurajojnë të vazhdojmë të punojmë në mënyrë aktive në atë rrugë për të gjetur një zgjidhje. Ne do të vazhdojmë ta bëjmë këtë pavarësisht nga agjenda politike ditore. Siç kemi arritur me NATO -n, do të kemi sukses edhe me BE -në. Pra, pyetja nuk është nëse, por kur.”,- tha ministri i jashtëm, Bujar Osmani.
