“Ukraina është një skenë krimi”, kështu tha kryeprokurori i Gjykatës Penale Ndërkombëtare, Karim Khan, i cili vizitoi qytetin ukrainas të Bucha.
“Për çdo individ, veçanërisht civilët, ne duhet të flasim për ta dhe duhet të këmbëngulim që të arrijmë në të vërtetën e asaj që ka ndodhur, në mënyrë që të mund të sigurohemi të ndajmë të vërtetën nga trillimi dhe të shkojmë përpara për të këmbëngulur në të drejtën e çdo individi, çdo fëmije, çdo gruaje, çdo burri”.
“Ne jemi këtu sepse kemi arsye për të besuar se krime brenda juridiksionit të gjykatës po kryhen”, u tha ai gazetarëve, ndërsa shtoi se një ekip mjeko-ligjor i gjykatës do të fillonte punën shumë shpejt në qytet.
Bucha ka qenë skena e qindra vrasjeve të civilëve për të cilat Ukraina ia ka vënë gishtin rusëve që e pushtuan atë për disa javë. Megjithëse Rusia mohon përgjegjësinë për vdekjet.
Ndërkohë një mision ekspertësh i krijuar nga vendet e Organizatës për Siguri dhe Bashkëpunim dhe Evropë (OSBE) ka gjetur prova të krimeve të luftës nga Rusia në Ukrainë, thuhet në një raport paraprak të organizatës.
“Misioni gjeti prova të qarta të shkeljeve të së drejtës ndërkombëtare humanitare nga forcat ruse,” thuhet në raport, duke përmendur dështimin për të marrë masat e nevojshme, për të vepruar në mënyrë proporcionale ose për të mos sulmuar vende si shkollat dhe spitalet.
Pavarësisht mohimeve nga ana e rusëve, raporti thotë se një sulm i 9 marsit në Spitalin e Fëmijëve në Mariupol ishte kryer nga Rusia dhe ata që ishin përgjegjës pasi kishin kryer një krim lufte.
Raporti thotë se trupat ruse ka të ngjarë të kenë kryer edhe krime kundër njerëzimit pas pushtimit , por për momentin ende nuk mund të dalin në një përfundim mbi këtë çështje.
