Kompania, siç mund të shihet në faqen e saj të internetit, ka investuar 6 milionë euro në inovacion dhe ka 16 filiale në 13 vende ku punësohen mbi 600 persona. Ajo ka 2,400 klientë në 55 vende, kryesisht vendpushimet e skive. Në Itali, kjo kompani menaxhon mbi 1200 kilometra shtigje në 12 zona skijimi në Alpet Dolomite.
“TechnoAlpine” është një kompani ekperte t kur bëhet fjalë për bërjen e borës, me më shumë përvojë si furnizues i sistemeve “çelës në dorë” dhe aftësinë për të ofruar një zgjidhje optimale për çdo kërkesë për bërjen e borës dhe për këtë arsye garanton cilësi të përsosur të borës, shkruan në webfaqen e tyre, përcjell TS.
Kompania “TechnoAlpine” është partnere e Federatës Ndërkombëtare të Sporteve Dimërore dhe është partnere e një sërë ngjarjesh skijimi.
Kjo kompani është gjithashtu aktive në rajon. Bashkëpunon me të gjitha qendrat e skijimit në Bullgari dhe së fundmi ka instaluar topa bore në Jahorinë, Bosnje dhe Hercegovinë. Topat e saj të borës janë instaluar edhe në qendrat serbe të skive.
Bashkëpronari dhe CEO i “TechnoAlpine”, Erich Gummerer, është pronar i kompanisë “Vitosha-ski”, e cila tani po zhvillon edhe qendrën e skijimit në malin Vitosha afër Sofjes.
Siç shkruajnë mediat bullgare një vit më parë, kjo kompani dhe kompania “Julen”, e cila është koncesionere e zonës së skive në Bansko, i përkasin kompanive të regjistruara në një zonë offshore. Të dy kompanitë ishin të lidhura me bashkëpronarin e Bankës së Parë të Investimeve dhe presidentin e Federatës Bullgare të Skive Ceko Minev, i cili u emërua pronar i “Julen” nga kryeministri i atëhershëm i Bullgarisë Bojko Borisov. Më vonë u konstatua se pronari i vërtetë i “Julen” ishte legjenda e skijimit Mark Girardelli.
