13 viruse ‘zombie’ që ishin bllokuar për mijëvjeçarë në permafrostin e Siberisë janë ringjallur: më i vjetri daton pothuajse 50,000 vjet më parë dhe si të tjerët ka treguar se ende është në gjendje të infektojë qelizat me të cilat u fut në kontakt laboratorik.
Këtë e demonstrojnë eksperimentet e kryera nga grupi ndërkombëtar i udhëhequr nga mikrobiologu Jean-Marie Alempic, i Qendrës Kombëtare Franceze për Kërkime Shkencore (Cnrs). Rezultatet janë publikuar online në faqen e internetit bioRxiv, ku ndahen artikuj të pa shqyrtuar ende nga komuniteti shkencor dhe demonstrojnë se si shkrirja e akullit për shkak të ngrohjes globale mund të zgjojë mikroorganizma të panjohur dhe potencialisht të rrezikshëm.
Viruset e rishfaqura nga Siberia kanë një gjenom të ndryshëm nga viruset e tjerë të njohur aktualisht.
Nëntë prej tyre janë dhjetëra mijëra vjet të vjetër: më i vjetri, daton 48,500 vjet më parë, është një virus gjigant që infekton organizmat njëqelizore të njohur si ameba dhe është quajtur Pandoravirus yedoma.
Studiuesit e gjetën atë të varrosur nën një liqen, ndërsa viruset e tjera u nxorrën nga burime të tjera, duke përfshirë lëkurën e një mamuthi dhe zorrët e një ujku siberian, të gjitha të varrosura nën ngricën e përhershme. Të sjellë në laborator dhe të vënë në kontakt me qelizat e amebës, viruset kanë treguar se janë ende në gjendje t’i infektojnë ato.
Prandaj studiuesit arrijnë në përfundimin se është “legjitime të reflektohet mbi rrezikun që grimcat e lashta virale të mbeten infektive dhe të kthehen në qarkullim për shkak të shkrirjes së shtresave të akullit”.
