SHBA-ja dhe OKB-ja janë të shqetësuara për shëndetin dhe sigurinë e presidentit të zgjedhur të Nigerit, Mohamed Bazoum, i cili ka kaluar më shumë se dy javë në arrest shtëpiak.
“Ne jemi shumë të shqetësuar për shëndetin e tij dhe sigurinë e tij personale dhe sigurinë personale të familjes së tij”, tha një zëdhënës i Departamentit amerikan të Shtetit.
Sekretari i Përgjithshëm i OKB-së, Antonio Guterres tha gjithashtu se ishte i shqetësuar, duke përfshirë “kushtet e mjerueshme të jetesës” në të cilat ishte raportuar familja.
Bazoum u rrëzua më 26 korrik.
Më herët, partia e Bazoum tha se ai dhe familja e tij po mbaheshin në kushte “mizore” dhe “çnjerëzore”, raporton Reuters.
Që atëherë, një junta ushtarake ka sunduar Nigerin, ndërsa Bazoum është mbajtur në pallatin presidencial. Anëtarët e juntës nuk kanë bërë asnjë koment për gjendjen e liderit të rrëzuar, raporton BBC, transmeton Klankosova.tv.
Të martën, sekretari amerikan i Shtetit Antony Blinken i telefonoi Bazoum duke e siguruar atë për mbështetjen e vazhdueshme të SHBA-së, tha Uashingtoni.
Zëdhënësi i Departamentit të Shtetit të SHBA, Mattheë Miller shtoi: “Me kalimin e kohës, duke qenë se ai mbahet i izoluar, është një situatë që është një shqetësim në rritje për ne.”
Partia politike e Bazoum, PNDS-Tarayya, pretendoi në një deklaratë se Bazoum dhe familja e tij nuk kishin akses në ujë të rrjedhshëm, energji elektrike, mallra të freskëta apo mjekë.
Deklarata i bëri jehonë komenteve të mëparshme të bëra nga kryeministri i zgjedhur i Nigerit, Ouhoumoudou Mahamadou, i cili ka thënë se Bazoum po mbahej me gruan dhe djalin e tij pa energji elektrike dhe ujë.
Komuniteti Ekonomik i Shteteve të Afrikës Perëndimore (Ecoëas) u kishte dhënë kohë udhëheqësve të grushtit të shtetit të Nigerit deri të dielën që të tërhiqen dhe të rikthejnë zotin Bazoum në presidencë.
Kreu i gardës presidenciale, gjenerali Abdourahmane Tchiani, pretendon se ai tani drejton Nigerin; ndërsa junta emëroi ish-ministrin e financave, Ali Mahaman Lamine Zeine, si kryeministër të ri pas grushtit të shtetit.
Regjimi i ri ushtarak ka mbyllur gjithashtu hapësirën ajrore të Nigerit deri në njoftimin e dytë, duke përmendur “kërcënimin e ndërhyrjes ushtarake” nga Ecowas.
