Ende zgjat hetimi rreth aksidentit në autostradën Struma ku humbën jetën 45 persona, pasi tërësisht u dogj autobusi i Besa-Trans. Po kontrollohet se cili institucion dështoi. Autoritetet thonë se do të përgjigjet secili që ka bërë lëshime. Ministri i Transportit Boçvarski tha se janë kontrolluar dy vozitësit e autobusit se e kanë pasur certifikatë, por jo edhe të gjithë vozitësit tjerë të kompanisë Besa-Trans.
“Ka institucione të cilat punojnë dhe hetojnë dhe në fund do të japin përgjigjen e tyre se ku është bërë lëshimi, në përputhje me atë secili do të bart përgjegjësitë e veta. Ne i kontrolluam të dy vozitësit, që kanë vozitur këtë autobus dhe i kemi dhënë të gjitha dokumentet në prokurori. Kur do të marrim informacion nga institucion apo organ kompetent, nga prokuroria apo nga MPB, se kush janë vozitësit tjerë që kanë vozitur ne menjëherë do ti kontrollojmë në bazën tonë të të dhënave.”, tha Bllagoj Boçvarski, ministër për tranpsport dhe lidhje.
