Inflacioni është në prirje rënëse dhe këtë e vërtetojnë të dhënat zyrtare të Entit Shtetëror për Statistika, të cilat tregojnë se nga 19,8% në tetor të vitit 2022, inflacioni ra në 11,3% për muajin paraardhës, tha zëvendëskryeministri i Qeverisë, përgjegjës për çështje ekonomike, koordinim me resorët ekonomikë dhe investimet, Fatmir Bytyqi, në një intervistë për portalin Lokalno.
Zëvendëskryeministri Bytyqi tha se pret që ky trend i uljes së inflacionit të vazhdojë deri në fund të vitit, gjë që është në përputhje me parashikimet e BPRM-së dhe Qeverisë, sipas të cilave inflacioni për gjithë vitin 2023 do të jetë rreth 8%.
“Nga ana tjetër, pritshmëria e rritjes së pagave me shkallë dyshifrore është realitet, duke pasur parasysh faktin se kemi arritur të krijojmë një mjedis ekonomik tërheqës për fluksin e investimeve të reja direkte vendore dhe të huaja që krijojnë një vlerë të shtuar shumë më të lartë, po ashtu do të rritet produktiviteti i ekonomisë së përgjithshme dhe do të rezultojë me një rritje reale të pagës mesatare në ekonominë e përgjithshme”, tha Bytyqi.
Zëvendëskryeministri Bytyqi iu referua edhe pritshmërive për lëvizjen e inflacionit, për të cilat tha se duhet të kemi parasysh që ekonomia jonë kombëtare nuk është e izoluar, e mbyllur.
“Ne jemi të ekspozuar ndaj forcave ekonomike që nuk njohin kufij dhe që ndikojnë në përcaktimin e performancës sonë. Kriza ekonomike nuk ka përfunduar ende, çështjet e energjisë janë ende të hapura. Nuk kishte asnjë ekonomi që të mos ndjente pasojat e agresionit rus kundër Ukrainës, një luftë që vazhdon ende dhe askush nuk mund të parashikojë se si do të zhvillohet. Ka shumë faktorë variabël që ndikojnë në inflacion, tek të cilët ne nuk kemi ndikim, megjithëse jemi të ekspozuar ndaj pasojave të tyre”, tha Bytyqi.
