Rusia po e akuzon Ukrainën se planifikon të përdorë të ashtuquajturën “bombë të pistë”, një pretendim i hedhur poshtë nga Kievi dhe aleatët e tij perëndimorë si një operacion fals që Moska mund ta përdorë si pretekst për të përshkallëzuar luftën e Kremlinit kundër fqinjit të saj.
Një “bombë e pistë” është një armë që kombinon eksplozivët konvencionalë si dinamit dhe materiale radioaktive si uraniumi. Shpesh përmendet si një armë për terroristët, jo për vendet, pasi është krijuar për të përhapur frikë dhe panik më shumë sesa për të eliminuar ndonjë objektiv ushtarak.
Zyrtarët ukrainas i kanë mohuar vazhdimisht akuzat e Moskës dhe ministri i Jashtëm ukrainas, Dmytro Kuleba ka ftuar inspektorët e OKB-së të vizitojnë Ukrainën, për të treguar se “nuk kanë asgjë për të fshehur”, raporton CNN.
