Jo vetëm përforcime në sulm, por edhe në mesfushë, për të ndërtuar një ekip të balancuar në të gjitha repoartet. I këtij mendimi është trajneri Santiago Solari, që ka marrë drejtimin e skuadrës së Real Madrid pas shkarkimit të Julen Lopetegui dy javë më parë. Ndaj, trajneri i ri ka kërkuar nga drejtuesit e klubit “merengues” që të sjellin në “Santiago Bernabeu” mesfushorin francez të Chelsea, NGolo Kante.
Për të realizuar këtë transferim skuadra spanjolle është gati të shpenzojë 140 milionë euro, shifër jashtëzakonisht e lartë, lajm që konfirmohet nga e përditshmja “Don Balon”, që i referohet burimeve brenda klubit. Trajneri Solari por edhe presidenti Florentino Perez mendojnë se Kante ka klasin për të marrë në dorë frenat e ekipit “merengues”, ndaj janë gati të bëjnë çmendurira për ta sjellë në Madrid.
