Në Bashkimin Evropian nuk ka më asnjë dyshim se vendet e Ballkanit Perëndimor duhet të
bëhen anëtarë të BE-së. Ky është qëndrimi i eurodeputetit dhe raportuesi për Maqedoninë e Veriut në Parlamentin Evropian, Thomas Waitz, i shprehur në takimin në Bruksel me
nënkryetarin e Qeverisë për politika të qeverisjes së mirë, Arben Fetai. Raportuesi Waitz tha se Maqedonia e Veriut duhet të përfitojë nga momenti i krijuar nga agresioni rus kundër Ukrainës dhe të bëjë gjithçka në fuqinë e saj për të hapur negociatat me synimin për anëtarësim të shpejtë në BE. Ai premtoi se do të bëjë gjithçka që është në fuqinë e tij dhe të Parlamentit Evropian për të arritur këtë qëllim të përbashkët strategjik.
Zëvendëskryeministri Fetai njoftoi Waitz për aktivitetet e Qeverisë për zbatimin e Agjendës
së reformave, veçanërisht në fushën e sundimit të ligjit dhe luftës kundër korrupsionit. Fetai po ashtu theksoi rëndësinë e ndërtimit të Korridorit 8 si projekt i sigurisë dhe për përballimin e sfidave mjedisore.
Ai shprehu shqetësimin për ndikimin rus në hapësirën informative të Maqedonisë së Veriut, e cila duhet të trajtohet si ç’ështje serioze që cënon sigurinë kombëtare të vendit.
Në fund, zëvendëskryeministri falënderoi nikoqirin për takimin konstruktiv dhe u zotua se do të koordinojnë aktivitetet që do të përcaktojnë të ardhmen evropiane të vendit.
