Hamasi ka rënë dakord me një propozim të të dërguarit special të SHBA-së, Steve Witkoff, për një armëpushim në Gaza, tha të hënën një zyrtar palestinez për Reuters, duke hapur rrugën për një përfundim të mundshëm të luftës me Izraelin.
Propozimi i ri, i cili parashikon lirimin e dhjetë pengjeve dhe 70 ditë armëpushim, u pranua nga Hamasi nëpërmjet ndërmjetësve, transmeton Telegrafi.
“Propozimi përfshin lirimin e dhjetë pengjeve të gjalla izraelite të mbajtura nga Hamasi në dy grupe në këmbim të një armëpushimi 70-ditor, dhe një tërheqjeje të pjesshme nga Rripi i Gazës”, tha burimi.
Propozimi gjithashtu parashikon lirimin e një numri të burgosurish palestinezë nga Izraeli, përfshirë qindra që vuajnë dënime të gjata me burg.
Më 18 mars, Izraeli në mënyrë efektive i dha fund një marrëveshjeje armëpushimi të janarit me Hamasin dhe rinovoi fushatën e tij ushtarake në Gaza. Hamasi dhe fraksionet aleate filluan të qëllonin me raketa dhe sulme dy ditë më vonë.
Hamasi ka thënë se është i gatshëm të lirojë të gjithë pengjet e mbetura të kapura nga personat e armatosur në sulmet ndaj komuniteteve në Izraelin jugor më 7 tetor 2023, dhe të bjerë dakord për një armëpushim të përhershëm nëse Izraeli tërhiqet plotësisht nga Gaza.
Kryeministri izraelit Benjamin Netanyahu ka thënë se Izraeli do të ishte i gatshëm të pranonte një armëpushim të përkohshëm vetëm në këmbim të lirimit të pengjeve, duke u zotuar se lufta mund të përfundojë vetëm pasi Hamasi të zhduket.
Izraeli nisi një luftë ajrore dhe tokësore në Gaza pas sulmit ndërkufitar të militantëve të Hamasit më 7 tetor 2023, i cili vrau 1,200 persona nga numërimet izraelite me 251 pengje të rrëmbyera në Gaza.
Në anën tjetër Izraeli ka vrarë gati 54,000 palestinezë, sipas autoriteteve shëndetësore të Gazës, dhe ka shkatërruar rripin bregdetar. Grupet e ndihmës thonë se shenjat e kequshqyerjes së rëndë janë të përhapura.