Zyrtarët europianë do të takohen sot për të diskutuar nëse Brexit do të realizohet brenda tre muajsh, apo brenda dy javësh. Vendimi për këtë diskutim do të jepet të hënën, por duket se ka nisur një lloj lodhjeje nga tejzgjatja e procedurës.
Presidenti i Këshillit Europian, Donald Tusk, ka thënë se ai do të donte të zgjidhej afati tre-mujor, që Britania të dalë më 31 janar. Ai ka pasur mbështetjen e Gjermanisë dhe Irlandës për këtë variant.
Megjithatë, presidenti Makron thuhet se po drejton një “rebelim”, i ndjekur nga Holanda, Belgjika, Luksemburgu e Spanja, duke kërkuar që Anglia të dalë nga BE-ja brenda dy javësh.
Kryeministri anglez, Xhonson, u tha deputetëve që kërkonin më shumë kohë se do t’ua plotësonte dëshirën nëse ishin të gatshëm të mbanin zgjedhje të përgjithshme më 12 dhjetor.
Xheremi Korbin, drejtuesi i opozitës angleze, tha se vendimi i tij do të vinte pasi të shqyrtonte afatin e ndonjë zgjerimi të mundshëm të Nenit 50, të garantuar nga Brukseli.
