Kongresi amerikan ka përmbysur veton e Presidentit Donald Trump për projekt-ligjin e rëndësishëm për mbrojtjen, një ngjarje që ndodh për herë të parë në presidencën e tij.
Senati i kontrolluar nga republikanët mbajti një seancë të pazakontë për ditën e parë të Vitit të Ri për të debatuar projekligjin, i cili ishte votuar tashmë nga Dhoma e Përfaqësuesve.
Fatura prej 740 miliardë dollarësh do të financojë politikën e mbrojtjes për vitin që vjen.
Z. Trump, i cili lë detyrën pas 20 ditësh, kundërshtoi disa dispozita në projekt-ligj.
Votimi në Senat kaloi me 81 pro kundrejt 13 kundër. Senatit i duhej një shumicë prej dy të tretave për të tejkaluar veton presidenciale në të dy dhomat.
Votimi vjen vetëm dy ditë para se Kongres i ri i SHBA të betohet.
Ai gjithashtu donte që projektligji të shfuqizonte një mburojë të përgjegjësisë për kompanitë e mediave sociale.
Presidenti Trump, i cili u kthye në Uashington të enjten nga klubi i tij privat në Florida, ka rritur trysninë ndaj republikanëve dhe i ka kritikuar udhëheqësit e partisë.
Tensionet mes republikanëve po rriten gjithashtu rreth planit të disa konservatorëve për të shprehur kundërshtimin e tyre të mërkurën e ardhshme, kur Kongresi i ri zyrtarisht do të votojë mbi rezultatet e Kolegjit Zgjedhor që konfirmon fitoren e demokratit Joe Biden në zgjedhje para se ai të bëjë betimin më 20 janar.
Sipas njoftimeve të medias, kreu i shumicës republikane të Senatit Mitch McConnell, i cili ka pranuar publikisht fitoren e zotit Biden, ngriti të enjten pikëpyetje në një bisedë telefonike me grupin e tij rreth planit të senatorit republikan Josh Haëley për të kundërshtuar në seancën e datës 6 janar.
Sipas televizionit CNN, të paktën 140 republikanë në Dhomën e Përafqësuesve pritet të dalin me kundërshtime të ngjashme, pavarësisht se Kongresi në këtë rast ka thjesht një rol ceremonial.
Manovrat e planifikuara në seancë, mund të bëhen shkak për një debat të gjatë në Senat, por nuk kanë asnjë shans të përmbysin rezultatin e zgjedhjeve.
