Kryeministri Dimitar Kovaçevski, ka përgënjeshtruar deklaratën e ish- komandatit të UÇK-së, Rafiz Aliti, i cili dje tha se kryetari i BDI-së Ali Ahmeti, muaj më parë, ka biseduar me Kovaçevskin për një ligj të ri për të prekurit nga konflikti i vitit 2001, përfshirë këtu edhe pjesëtarët e UÇK-së dhe familjet e dëshmorëve, për të cilët premtohet zgjidhje ligjore që nga përfundimi i konfliktit.
“Nuk është e vërtetë”, ka thënë shkurt Kovaçevski i pyetur nga gazetarët nëse me Ahmetin ka biseduar për një ligj të tillë, siç deklaroi mbrëmë Aliti, në një intervistë për Alsat.
Duke folur për moszgjidhjen e statusit të UÇK-së prej dy dekadash, Aliti dje tha se BDI-ja nuk ka hequr dorë asnjëherë nga ish ushtarët shqiptarë dhe në këtë kuadër shpalosi përpjekjen e fundit që, sipas tij, e ka bërë Ahmeti muaj më parë.
Por, pavarëisht se deklaroi që kreu i “integristëve” ka biseduar me kryeministrin Dimitar Kovaçevski për një zgjidhje ligjore që do të përfshinte të gjithë të prekurit nga konflikti i vitit 2001, ai nuk tregoi cili ka qenë epilogu i këtyre bisedimeve mes dy partnerëve të koalicionit qeveritar dhe nëse Kovaçevski ka treguar gatishmëri për idenë e Ahmetit.
“Para disa muajve, kryetari i BDI-së, Ali Ahmeti, e ka hapur këtë çështje edhe me kryeministrin Dimitar Kovaçevski dhe ish-gjeneralin Angelovin, se është i gatshëm që të miratohet një ligj i cili do t’i trajtojë kategoritë të cilat kanë pësuar në vitin 2001. Nuk janë vetëm luftëtarët e UÇK-së. Ne kemi edhe disa kategori tjera, si rasti i Kumanovës, rasti Poroji, apo në Tetovë që u bombardua, apo në Luboten, rasti i civilëve që kanë pësuar. I kemi edhe familjeve
të të zhdukurve, qoftë te pala maqedonase, qoftë te pala shqiptare që me një ligj gjithëpërfshirës tu mundësojmë një trajtim prej institucioneve shtetërore që të kenë ndonjë benefit, për shkak se edhe ato familje duhet të mbijetojnë. Miratimi i një ligji në këtë drejtim, do të ishte në dobi të të gjithë qytetarëve, pavarësisht kush në cilën anë ka qenë në vitin 2001”, tha Rafiz Aliti – Mësuesi në intervistë për Alsat.
Në këtë intervistë, Aliti, tha se BDI-ja ka bërë shumë punë për ri-socializimin e ish ushtarëve të UÇK-së, “siç e parashikonte Marrëveshja e Ohrit”.
Megjithatë, ai e ka pranuar se edhe përkundër përpjekjeve të shumta, BDI-ja nuk ka arritur ta rregullojë me Ligj statusin e ish pjesëtarëve të UCK-së, siç ndodhi me “branitellat”, menjëherë pas konfliktit të vitit 2001.
