Një punëtor 33-vjeçar nga fshati Çellopek i Tetovës ka ndërruar jetë gjatë ditës së djeshme, pasi që një armaturë hekuri prej një largësie prej disa metrave ka rënë mbi të, informojnë nga Policia. Ai është Mahir Abazi nga fshati Çellopek, për të cilin ngushëllime dhe dhimbje kanë shprehur edhe autoritetet komunale të Bërvenicës, pasi që ka qenë punëtor i një ndërmarrje të saj. Por lidhur me rastin tragjik sot MPB ka dhënë versionin e saj.
“Më 18.02.2019 në ora 15:00 në SPB Shkup është paraqitur se në një objekt ndërtimor në rrugën “Londonska” në Shkup, të cilin e ndërton një ndërmarrje nga Tetova në Pronësi të G.H. (54) nga fshati Reçicë e Vogël, ka ndërruar jetë një punëtor M.A. (33) nga fshati Çellopek i Tetovës. Sipas të paraqitjes, derisa M.A. është përpjekur që të ngarkojë armaturë të hekurit në kran, armatura është shkëputur prej kranit dhe prej lartësisë prej disa metrave armatura ka rënë mbi punëtorin. Mjeku i Urgjencës e ka konstatuar vdekjen, ndërkaq me urdhër të prokurorit publik, trupi është dorëzuar për autopsi. Prokurori publik ka kryer ekspertizë në vendin e ngjarjes”, thonë nga MPB.
