Maqedonia nuk do të marrë pjesë në Eurovision 2023, këtë e ka konfirmuar sot drejtori i Radio Televizionit të Maqedonisë, Marjan Cvetkovski. Ai për MMS konfirmoi se Maqedonia për herë të parë pas pavarësisë nuk do të jetë pjesë e ngjarjes më të madhe muzikore në Evropë, ndërsa shtoi se mjetet financiare për këtë ngjarje do të përdoren për pagesën e rrymës elektrike.
“Po, ne nuk do të marrim pjesë në Eurovizion. Nuk kemi paguar tarifën e regjistrimit. Problemi më i madh është rryma dhe kostot e larta, të cilat do të dalin nga udhëtimi dhe qëndrimi në Britaninë e Madhe. Për shkak të kësaj situate janë reduktuar të gjitha shpenzimet, kështu që edhe ato që është dashur të paguhen për pjesëmarrje në Eurosong i kemi alokuar për pagesën e energjisë elektrike”, tha Cvetkovski.
