Oda Ekonomike e Turqisë dhe Maqedonisë (MATTO) do të ndërtojë shkollë të re në vendin e shkollës së rrënuar në rajonin e Malatias, Republika e Turqisë, e cila u godit nga tërmeti. Emri i shkollës do të jetë “Republika e Maqedonisë së Veriut”.

Kështu bëri të ditur kryetari i MATTO-s, Ajdovan Ademoski, në darkën e mbrëmshme të iftarit të organizuar nga Oda. Ademoski theksoi se në shenjë falënderimi, organet kompetente në Turqi 34 klasave do t’u japin emrat e qyteteve të Maqedonisë.

“Që në momentin e parë ndajmë dhimbjen me popullin vëllazëror turk, mobilizuam shtetin, institucionet, organizatat joqeveritare, Kryqin e Kuq dhe mbarë popullin maqedonas, si dhe siguruam mbështetje materiale dhe financiare në shumë prej afro 3.000.000 euro dhe rreth 50 maune me ndihmë materiale. Në emrin tim dhe në emër të MATTO-s, dëshiroj të shpreh mirënjohjen time për Qeverinë e Republikës së Maqedonisë së Veriut, e cila në këto ditë të vështira sillet si një mik i vërtetë. Qeveria, bota e biznesit dhe ne, odat ekonomike i kemi dhënë ndihme të rëndësishme Turqisë, por nuk duhet të ndalemi me kaq”, tha Ademoski në fjalimin e tij para të pranishmëve.

Ai informoi se anëtarët e MATTO dhe Matusiteb-it kanë iniciuar dhe janë angazhuar në realizimin e projekt-donacionit për ndërtimin e njërës prej 111 shkollave të rrënuara në rajonin e Malatisë.

“Me këtë veprim ata bëjnë një hap përpara në drejtim të vazhdimit të angazhimeve të tyre, zhvillimit të idesë së miqësisë dhe solidaritetit dhe ngritjes së miqësisë në nivel edhe më të lartë. Në këtë mënyrë do të ndihmohet dhe vazhdohet drejtpërdrejt rritja, zhvillimi dhe edukimi i fëmijëve që kanë mbetur pa shkolla dhe përveç kësaj, gjeneratat e reja do të marrin një shembull dhe imazh të bukur të humanizmit dhe miqësisë mes këtyre dy popujve”, nënvizoi Ademoski.

Pas fjalës së tij, me videoprojeksion para të ftuarve u prezantua projekti i shkollës që do të ndërtohet .

“Gjatë kësaj periudhe Turqia po përballet me shkatërrimin e shkaktuar nga katastrofa e paparë natyrore. Shteti po punon shumë për të shëruar plagët me mbështetjen e bashkësisë ndërkombëtare. Që nga dita e parë, Maqedonia e Veriut na ndihmoi menjëherë, duke ndarë dhimbjen tonë. Janë dërguar ekipet e kërkim-shpëtimit. Qeveria, institucionet zyrtare, organizatat joqeveritare, me pak fjalë, të gjithë nga të gjitha anët e këtij vendi dhanë mbështetjen e tyre të çmuar. Populli turk ju është mirënjohës. Brezat tanë të ardhshëm do të kujtojnë me mirënjohje dashurinë dhe solidaritetin e treguar nga njerëzit e bukur të këtij vendi, zemrat e të cilëve rrahin për Turqinë”, tha ambasadori turk në vend, Hasan Mehmet Sekizkok.

Sipas tij, nuk mund të ketë shembull më të mirë të solidaritetit sesa përpjekja e MATTO-s për të ndërtuar shkollë.

Në darkën e iftarit ishin të pranishëm edhe zyrtarë të lartë të qeverisë. Zëvendëskryeministri për Çështje Ekonomike, Fatmir Bytyqi, ka drejtuar porosi me rastin e Ramazanit. Ai tha se është muaj i agjërimit dhe heqjes së ushqimit dhe pijeve për muslimanët, por edhe muaj i pastrimit nga sjellja e keqe, urrejtja, zilia, madje edhe nga të gjitha mendimet e këqija.

“Ramazani është muaji i madhërimit të karakteristikave njerëzore, duke theksuar parimet morale, vlerat dhe solidaritetin me njerëzit e tjerë. Për mendimin tim, nisma e MATTO-s për ndërtimin e një shkolle për fëmijët e prekur nga tërmeti nuk mund të kishte simbolizuar solidaritet më të mirë. Prandaj, do të doja të shfrytëzoj rastin për të shprehur mirënjohjen time”, theksoi Bytyqi.

Në programin e iftarit të MATTO-s morën pjesë kryetari i Kuvendit Talat Xhaferi, ministri i Punëve të Brendshme Oliver Spasovski, ministrja e Mbrojtjes Sllavjanka Petrovska, ministri i Financave Fatmir Besimi dhe ministra të tjerë, kryetarë komunash, politikanë, përfaqësues të shoqatave dhe një një numër i madh i afaristëve.

Programi i Iftarit përfundoi me lutjen e Mustafa Boturit, këshilltar për shërbime fetare në Ambasadën e Republikës së Turqisë në Shkup.