Shefi i OBSH-së Dr. Tedros Adhanom Ghebreyesus ka deklaruar këtë të dielë se organizata ka humbur komunikimin me kontaktet e saj në spitalin Al-Shifa në Rripin e Gazës.
“OBSH ka humbur kontaktin me pikat e saj qendrore në Spitalin Al-Shifa në Gaza, mes raporteve të tmerrshme se spitali po përballet me sulme të përsëritura. Ka raportime se disa nga ata që ikën nga spitali janë qëlluar, plagosur ose vrarë. Raportet e fundit thonë se spitali ishte i rrethuar nga tanke”– tha Tedros në X.
Duke shprehur shqetësimin për sigurinë e punonjësve shëndetësorë dhe pacientëve, duke përfshirë edhe mbështetjen e jetës për foshnjat, ai bëri thirrje për një armëpushim të menjëhershëm humanitar në enklavë si “mënyra e vetme për të shpëtuar jetë dhe për të zvogëluar nivelet e tmerrshme të vuajtjes”.
“OBSH gjithashtu bën thirrje për evakuime të qëndrueshme, të rregullta, të papenguara dhe të sigurta mjekësore të pacientëve të lënduar dhe të sëmurë rëndë. Të gjithë pengjet duhet të marrin kujdesin e duhur mjekësor dhe të lirohen pa kushte.”
Forcat izraelite bombarduan sërish Spitalin Al-Shifa në Gaza të shtunën, duke synuar këtë herë Njësinë e Kujdesit Intensiv (ICU). Nga sulmet mbetën të plagosur disa anëtarë të stafit në detyrë dhe disa foshnja u vendosën në rrezik vdekjeje për shkak të mungesës së oksigjenit pas një ndërprerjeje të energjisë.
Ministri palestinez i Shëndetësisë Mai al-Kaila kishte thënë se 39 foshnja në kujdesin intensiv në spitalin Al-Shifa janë në “gjendje rreziku për jetën për shkak të mungesës së oksigjenit”.
Ajo tha se 20 nga 35 spitalet në Gaza kanë dalë jashtë shërbimit që nga 7 tetori për shkak të sulmeve izraelite dhe mungesës së karburantit.
Izraeli ka nisur sulme të pamëshirshme ajrore dhe tokësore në Rripin e Gazës – duke përfshirë spitalet, rezidencat dhe shtëpitë e adhurimit – që nga një sulm ndërkufitar nga grupi i rezistencës palestineze Hamas më 7 tetor.
Të paktën 11,078 palestinezë janë vrarë, duke përfshirë 4,506 fëmijë dhe 3,027 gra. Sipas shifrave zyrtare, numri i të vdekurve izraelitë është rreth 1200.
