Pacolli: Rezoluta lartëson Kushtetutën dhe fuqizon pozitën dialoguese të Kosovës

Ministri i Punëve të Jashtme të Kosovës, Behgjet Pacolli, ka deklaruar se procesit dialogues të Kosovës, iu është hapur rrugë fuqizuese me rastin e nxjerrjes së rezolutës së fundit për bisedimet me Serbinë.

Marketing

Në një reagim të tij përmes llogarisë zyrtare në facebook, Zëvendëskryeministri Pacolli më tej ka komentuar edhe bashkimin e spektrit politik në kuadër të arritjeve të marrëveshjeve madhore për vendin në proceset dialoguese.

”Me nismën për nxjerrjen e rezolutës për dialogun me Serbi, subjektet politike pjesë e koalicionit qeverisës, i kanë hapur rrugë fuqizimit të pozitës dialoguese të Republikës së Kosovës në funksion të arritjes së Marrëveshjes ligjërisht ndërkombtarisht obligative në mes Republikës së Kosovës dhe Serbisë.

Përmbajtja e rezolutës krijon mundësi për një strukturë përfaqësuese konsensuale, në përbërje të gjithë spektrit politik shumicë.

Me nxjerrje të rezolutës, partitë hezituese në lidhje me dialogun dhe debatin rreth tij, arrijnë synimin e përbashkët, pozicionimin e Kuvendit të Republikës së Kosovës si epiqendër e filtrimit dhe aprovimit të Marrëveshjes ligjërisht ndërkombtarisht obligative.

Rezoluta lartëson frymën kushtetuese dhe vendosmërinë e orientimit tonë perëndimor, strategjik, në partneritet me shtete të fuqishme dhe organizata ndërkombëtare. Eliminimi i mundësisë së krijimit të një shkalle të ndërmjetme të pushtetit, dhe i mundësisë së prekjes së sovranitetit dhe integritetit territorial të Republikës, pozicionon Kosovën në çfarëdo formati dhe konteksti dialogues. Është koha të projektojmë energji të re, dhe nga debati i brendshëm rreth dialogut, të dalim më të fuqishëm se kurdoherë.
Koha po ikë, rezoluta pret aprovim sa më shpejtë!”

Marketing