Maqedonia e Veriut do të ecë përpara. Anëtarësimi i plotë në BE deri në vitin 2030 është një objektiv ambicioz, por i arritshëm për vendin. Koalicioni qeveritar është stabil dhe fuqishëm i bashkuar dhe do ta arrijë këtë qëllim, ky është kontstatimi nga takimi i fundit i liderëve të koalicionit qeveritar, shkruan Indeks.mk
Mbështetja amerikane për rrugën evropiane të Maqedonisë së Veriut, si dhe reformat e nevojshme për hyrjen në BE, janë temat kryesore për të cilat kanë biseduar partnerët e koalicionit qeveritar. Ndonëse disa nga partitë më të vogla në të kaluarën kanë shprehur pakënaqësi dhe kanë paralajmëruar mundësinë e daljes nga koalicioni, kryeministri thotë se tashmë është takuar me ta dhe bisedimet do të vazhdojnë për plotësimin e kërkesave të tyre. Gjëja më e rëndësishme, sipas Kovaçevskit, është që të gjithë të jenë të bashkuar rreth agjendës evropiane. Ai i dërgoi porosi opozitës të udhëhequr nga VMRO-DPMNE se koha po ikën dhe ata duhet të zgjedhin se në cilën rrugë të ecin.
Opozita nuk ka nevojë të më mbështesë mua, apo Qeverinë. Ajo duhet të mbështesë të ardhmen evropiane të qytetarëve tanë. Ata duan të jetojnë në BE, në një shtet anëtar të BE-së, thotë Kovaçevski, duke kritikuar qëndrimin e VMRO-DPMNE-së ndaj çështjeve strategjike dhe vendimeve në shtet, pasi partia refuzoi të caktoi përfaqësues të saj në grupin punues për përgatitjen e propozimeve për ndryshimet kushtetuese.
U bëj thirrje për përgjegjësi politike. Ftoj të gjitha partitë dhe aktorët shoqërorë që t’i bashkohen realizimit të synimeve strategjike të shtetit. Le të marrim vendimet së bashku dhe të sigurojmë së bashku të ardhmen evropiane. Të votojmë së bashku për Evropën, për të ardhmen evropiane, sepse nuk kemi kohë për të humbur, tha Kovaçevski.
Vazhdimi i rrugës evropiane, sipas tij, është një shans historik që ai nuk është i sigurt se vendi do ta ketë sërish.
“Është një shans që duhet shfrytëzuar tani dhe menjëherë”, tha Kovaçevski. Ndaj, shton ai, opozita që po bllokon vendin në rrugën europiane, do të duhet të vendosë nëse do t’i bashkohet bllokut proevropian apo do të mbetet peng i “Levicës”.
Ata do të duhet të vendosin shumë shpejt nëse do të kapin trenin e fundit dhe do t’i bashkohen bllokut pro-evropian që pashmangshëm do të shkojë dhe do të marrë vendime për anëtarësimin e Maqedonisë në BE, është i vendosur kryeministri.
KOVAÇEVSKI: NUK PO MENDOJ TË JAP DORËHEQJE
Kryeministri Dimitar Kovaçevski nuk po mendon të japë dorëheqje nëse deri në nëntor nuk zbatohen ndryshimet kushtetuese, proces për të cilin për momentin nuk kanë mbështetjen e opozitës.
Detyrimi për ndryshime kushtetuese është një shumicë prej dy të tretash. Të gjithë e kanë atë obligim, jo vetëm Qeveria, por edhe të gjithë aktorët politikë dhe çdo deputet që të vendosë për të ardhmen e qytetarëve, sepse ata duan dhe meritojnë një të ardhme evropiane. Mandati i Qeverisë nuk është i lidhur me votimin e amendamenteve kushtetuese, thotë Kovaçevski.
NJË ZONË ELEKTORALE
Kryeministri Dimitar Kovaçevski duke folur për reformat në drejtësi ka deklaruar se janë dakorduar që në kuadër të Komisionit të Sistemit Politik në Kuvend të hapet një seancë dëgjimore dhe të formohet një grup që do të punojë për hartimin e një zgjidhje ligjore për vettingun. Gjithashtu është rënë dakord që diskutimi për propozimet ligjore për një njësi zgjedhore të bëhet në kuadër të Parlamentit dhe të merren parasysh të gjitha aspektet e partive politike.
Lidhur me propozimet për një njësi zgjedhore, liderët e partive politike të koalicionit qeveritar ranë dakord që diskutimi të bëhet në kuadër të Parlamentit.
Në koalicion qeveritar dhe opozitë ka mendime të ndryshme për Kodin Zgjedhor. LSDM është parti që në programin e saj ka mbështetje për një njësi zgjedhore, por në kuadër të Parlamentit do të diskutohet për modalitetet nëse duhet të ketë prag zgjedhor…, tha Kovaçevski.
Grupi punues për përgatitjen e propozim-iniciativës për nevojën e ndryshimeve kushtetuese me të cilat bullgarët dhe popujt e tjerë të përfshihen në aktin më të lartë juridik të shtetit, në seancën e fundit, njëzëri miratoi Rregulloren e punës. Presidentja Margarita Caca-Nikolovska hodhi poshtë mundësinë që grupi punues të debatojë për ndërhyrje të tjera në Kushtetutë.
Formulimi “20 për qind”, gjegjësisht të zëvendësohet me “gjuhën shqipe”, është kërkesë e disa prej partive politike shqiptare.
