Shkëndija ka mbyllur aventurën europiane në mënyrën më të keqe, që kur se kjo skuadër po na prezanton në Europë nën ëmbrellën e “Ecolog”.
4 ndeshje, 4 disfata dhe asnjë gol të shënuar. Vërtetë një gjë të tillë nuk e kishte pritur askush, mirëpo ja që ndodhi, ndërsa e gjithë kjo lë hapësira për ndryshime të mëdha, edhe atë duke filluar që nga kryesia, stafi i trajnerëve dhe disa prej futbollistëve, shkruan “infOSport.mk”.
Pas dy disfatave ndaj skuadrës sllovene të Mura (0:5, 0:1) në raundin e parë kualifikues të Ligës së Kampionëve, skuadra tetovare u mund edhe në të dyja ndeshjet e Ligës së Konferencës, këtë herë nga skuadra letoneze e FC Riga.
Pas disfatës 2:0 në Letoni, “kuqezinjtë” sonte në arenën “Todor Proeski” pësuan disfatë 1:0, duke u eliminuar kështu edhe nga Liga e Konferencës. Golin e vetëm për ekipin e FC Riga e realizoi Soisalo në minutën e 52-të, duke i siguruar skuadrës së tij një vend për në turin e tretë të këtij kompeticioni më të ri futbollistik.
Sezon ky për tu harruar nga Shkëndija në Europë, aty ku shpresojmë të shohim një skuadër më ndryshe “kuqezi” sezonin e ardhshëm. (infOSport.mk)
