Një natë të ftohtë në dhjetorin e vitit 2019, Shatha Hassan, 23-vjeçare, u zgjua nga vëllai i saj Mohamed për t’i thënë asaj se ushtria izraelite kishte rrethuar shtëpinë e tyre në qytetin e Ramallahut në Bregun Perëndimor të pushtuar.
Forcat izraelite hynë në shtëpi dhe arrestuan Shatha-n, aktiviste dhe studente në Universitetin e Birzeit-it pranë Ramallahut.
Një muaj më vonë, vëllai i Shatha-s, Abd Al-Majeed, 20 vjeç, u arrestua në një tjetër bastisje të shtëpisë së tyre dhe u mbajt për një muaj në qendrën e marrjes në pyetje Al-Maskobiya në Kuds.
Pasi u mor në pyetje nga hetuesit izraelitë, Abd Al-Majeed u urdhërua të lirohej nga gjykata ushtarake Ofer. Megjithatë, e njëjta gjykatë lëshoi një urdhër burgimi administrativ kundër Shatha-s.
Burgimi administrativ lejon autoritetet izraelite të zgjasin mbajtjen e një të burgosuri pa akuzë pas skadimit të dënimit që varion nga dy deri në gjashtë muaj.
Ndërsa Shatha u mbajt në burgun Damon afër Haifas, forcat izraelite bastisën përsëri shtëpinë e saj dhe arrestuan vëllain e saj Mohamed, i cili është gjithashtu një aktivist student në Universitetin e Birzeit-it.
“Unë mora lajmin se Izraeli kishte arrestuar vëllezërit e mi kur unë isha në burg”, tha Shatha për Anadolu Agency (AA).
“Ky veprim ishte shumë i vështirë dhe i dhimbshëm. Është i ashpër edhe sikur të isha jashtë burgut”, theksoi ajo.
Universiteti në Birzeit ka qenë prej kohësh një qendër për aktivizmin studentor në territoret palestineze.
Sipas shifrave të universitetit, më shumë se 414 studentë u arrestuan nga Izraeli në dhjetë vitet e fundit dhe ishin të ekspozuar ndaj marrjes në pyetje, gjykimeve dhe burgimit administrativ.
Shumica e studentëve janë akuzuar për pjesëmarrje në aktivitetet studentore të bllokut islam, krahut studentor të grupit të rezistencës palestineze Hamas, dhe Polit Studentor Demokrat Progresiv, blloku i majtë në Universitetin e Birzeit-it.
Izraeli zyrtarisht i ka shpallur të dy blloqet si “shoqata të paligjshme”.
– Aktivitetet humane
Në kampus, Shatha dhe dy vëllezërit e saj u morën me aktivitete studentore, së bashku me shokët e tyre. Më pas, ata u takuan në burg.
“Ne ndamë fëmijërinë tonë, oborret e universitetit, aktivitetet tona studentore dhe më pas muret e burgut”, tha Shatha, duke evokuar kujtimet me vëllezërit e saj.
Më 21 shkurt, gjykata ushtarake Ofer dënoi Mohamedin me burgim 14-mujor dhe një gjobë prej 1.800 dollarësh për aktivitetin e tij studentor në kampus.
“Prindërit e mi ishin aktivistë kur ishin studentë në Universitetin e Birzeit-it dhe u arrestuan për shkak të kësaj” tha Shatha.
“Sot, ne jemi të ekspozuar ndaj së njëjtës përvojë pas më shumë se 30 vitesh”, shtoi ajo.
Studentja ishte përgjegjëse për aktivitete shoqërore, si organizimi i ngjarjeve me spitale, jetimore dhe shtëpi për të moshuarit.
“Nuk besoja se një ditë do të mbahemi të arrestuar për muaj për shkak të aktiviteteve tona studentore. Nuk besoja se do të jem në burg për shkak të këtyre aktiviteteve humane”, theksoi ajo.
– Aktivizmi studentor
Në burg, Shatha u takua me shoqet e saj studente, Mays Abu Gosh dhe Samah Jaradat, të cilat u arrestuan në verën e vitit 2019.
Sot, katër studente femra dhe dhjetëra meshkuj mbahen nga forcat izraelite për shkak të aktivizmit të tyre në kampus në Universitetin e Birzeit-it.
“Sapo hyra në burg, Mays dhe Samah erdhën në qelinë time për të pyetur rreth lajmeve të fundit të universitetit” tha Shatha.
“Sytë e tyre po shkëlqenin, ata po pyesnin për gjithçka në lidhje me universitetin”, shtoi ajo.
“Kur autoritetet izraelite më zhvendosën në një qeli tjetër, ne takoheshim në oborrin e burgut. Të burgosurit e tjerë na thërrisnin ‘familja Birzeit’”, theksoi Shatha.
“Ne ecnim në oborr me Khaleda Jarar, e cila është një akademike e lartë në Universitetin e Birzeit-it. Ndiheshim si studentë që flisnin me mësuesen e tyre”, tregon më tej Shatha.
Tri vajzat më vonë u lanë të lira, por ata lanë pas katër studente të tjera të mbajtura nga Izraeli në burgun Damon.
Sipas shifrave zyrtare, Izraeli mban 35 gra palestineze në burgun Damon, katër prej të cilave janë studente.
