Mesfushori i Manchester Cityt, Kalvin Phillips ka rënë dakord që t’i bashkohet Juventusit në janar.
Phillips pritet të largohet nga kampioni evropian këtë merkato dimërore, pasi që nuk është më në planet e Pep Guardiolas, raporton KosovaPress.
Mesfushori anglez zgjodhi mos të largohej nga City gjatë kësaj vere, pavarësisht se ishte paralajmëruar për rolin e tij në skuadër, por tani është i gatshëm për një aventurë të re.
Drejtorët sportivë të Juventusit, Cristiano Giuntoli dhe Giovanni Manna udhëtuan drejt Londrës këtë vikend dhe u takuan me përfaqësuesit e Stellar Group, agjencia që e përfaqëson Phillips. Aty, dy palët diskutuan idenë e një huazimi gjashtë mujor te Juventusi për mesfushorin.
“Gazzetta dello Sport” ka detajuar se si Phillips ka rënë dakord që ta bëjë lëvizjen te Juventusi në janar, duke e lejuar klubin për të nisur seriozisht punën për të arritur marrëveshje me Manchester Cityn.
Phillips fiton pesë milionë euro neto në sezon, kështu që Juvnetusi është duke e konsideruar nëse është vendim i duhur që të paguajë gjysmën e asaj shume për ta pasur anglezin për pjesën e dytë të sezonit.
