Mbyllja e plotë e Turqisë, e cila hyn në fuqi më 29 prill dhe do të zgjasë deri më 17 maj, nuk do të zbatohet për turistët e huaj që vizitojnë vendin gjatë asaj periudhe, njoftoi sot Ministria e Brendshme e Turqisë.
“Për shkak të përkeqësimit të situatës epidemiologjike, ne po shkojmë në mbyllje të plotë të enjten, 29 prill deri të hënën, 17 maj, nga ora 19:00 deri në 05:00 të mëngjesit,” njoftoi sot presidenti Recep Tayyip Erdogan, raportojnë mediat turke.
Përjashtimi nga këto masa do të zbatohet vetëm për të huajt që erdhën për një vizitë turistike në Turqi, por jo për ata që kanë një qëndrim në vend.
Pas takimit të kabinetit në kompleksin presidencial në Ankara, Erdogan ndau detaje në lidhje me futjen e masave të reja në Turqi në luftën kundër virusit korona.
Ai shtoi se brenda masave të reja epidemiologjike, udhëtimi ndërmjet qyteteve do të jetë i mundur vetëm me leje, dhe automjetet e transportit ndërmjet qyteteve do të punojnë vetëm me 50 për qind të kapacitetit.
Dyqanet ushqimore, zinxhirët e tregut do të mbyllen të dielën, dhe ditët e tjera ato do të jenë të hapura nga ora 10 e mëngjesit deri në 5 pasdite. Disa farmaci do të veprojnë si zakonisht dhe restorantet do të ofrojnë vetëm një shërbim shpërndarjeje, tha ministria e brendshme.
Me përjashtim të organizatave që përjashtohen nga vendimet e Ministrisë së Brendshme, të gjitha subjektet afariste do të pezullojnë veprimtarinë e tyre.
Klasat në të gjitha shkollat kalojnë në sistemin online, dhe të gjitha provimet do të shtyhen.
