Kryetari i Mitrovicës së Jugut, Agim Bahtiri, i prin listës me pasurinë më të madhe nga kryetarët e komunave të Kosovës.
Sipas deklarimit të pasurisë që ka bërë në Agjencinë Kundër-Korrupsion, Bahtiri ka pasuri të paluajtshme në vlerë prej 7 milionë e 560 mijë euro, raporton KTV.
Bahtiri ka deklaruar se posedon veturë në vlerë prej 10 mijë euro dhe para të gatshme 10 mijë euro.
Pasuri të paluajtshme, njëjtë ka deklaruar edhe vitin e kaluar, derisa 7 mijë e 150 euro ka pasur të gatshme gjatë 2018-s.
Pas tij, si më i pasuri është kryetari i Pejës, Gazmend Muhaxheri, me 2 milionë e 440 mijë euro pronë të paluajtshme, sa kishte edhe vitin e kaluar.
Muhaxheri ka deklaruar se në vitin 2019, ashtu sikurse edhe vitin e kaluar, posedon dy vetura në vlerë prej 26 mijë eurosh së bashku.
Derisa më 2018-n kishte 20 mijë euro para të gatshme, një gjë të tillë nuk e ka deklaruar këtë vit.
Kryetari i Prizrenit, Mytaher Haskuka, është i treti në listën e më të pasurve të komunave me 2 milionë e 327 mijë euro pasuri të paluajtshme këtë vit, 400 mijë më pak se sa vitin e kaluar.
E, Haskuka ka blerë një veturë më shumë, duke pasur në posedim këtë vit 3 vetura.
Para të gatshme këtë vit ka deklaruar se ka 6 mijë euro, 1 mijë më shumë sesa vitin e kaluar.
Milioner është edhe kryetari i Gjilanit, Lutfi Haziri, që këtë vit ka deklaruar se ka pasuri të paluajtshme në vlerë prej 1 milion e 851 mijë eurosh, 201 mijë më shumë se sa vitin e kaluar.
Haziri posedon shumë të lartë edhe të parave të gatshme, 229 mijë e 353 euro, ose 42 mijë e 159 më shumë sesa në vitin 2018.
Si më i pasuri në top 5-shën e kryetarëve, është edhe Stevan Vuloviq, kryetar i Zubin Potokut, me 1 milion e 50 mijë euro pasuri pronësore, rreth 2 milionë e 50 mijë euro, më pak se vitin e kaluar.
