Bashkimi Demokratik për Integrim mbetet në qëndrimin e se Maqedonia e Veriut ka nevojë për institucione që do të jenë të fokusuara në luftën kundër korrupsionit të nivelit të lartë në politikë. Kjo është kërkesë e Bashkimit Evropian, kjo është kërkesë e qytetarëve dhe me këtë qëndrim do të paraqitemi në takimin e liderëve. Këtë sot e ka deklaruar zv/kryeministri për Çështje Evropiane, Bujar Osmani, njofton Portalb.mk.
“BDI do të kërkojë të fillohet me realizimin e iniciativës për “veting”. Vlerësojmë se ajo është e domosdoshme nëse duam ta kthejmë besimin e qytetarëve në institucione, por edhe institucioneve të BE-së dhe kërkon që të plotësohen të gjitha çështjet që na hapin rrugën për marrjen e datës për fillimin e negociatave me Unionin”, tha Osmani.
“VETINGU është procesi që shërben për përjashtimin e zyrtarëve publik, të cilët nuk kanë integritet në përmbushjen e detyrës dhe në këtë mënyrë, rikthehet besimi i publikut në punën e institucioneve shtetërore. Procesi i vetingut, si rregull, kryhet duke kontrolluar figurën e dikujt përpara se t’i ofrohet një vend pune. Në varësi të vendit të punës ose të projektit, procesi i vetingut mund të bazohet në kontrollin e aftësive, personalitetit, pasurisë ose të ndonjë faktori tjetër që lidhet me qëllimin e vetingut.
