Qeveria hoqi nga rendi i ditës pikën për emërimin e drejtorëve të rinj. Kjo sipas organit ekzekutiv është bërë për shkak të procedurave juridike të cilat duhet ndjekur për çdo emërim. Të mërkurën Qeveria pritet të mbajë seancë të veçantë për emërimet e reja.
Në seancën e së mërkurës Qeveria pritet t’i emëroj edhe drejtorët dhe zëvendësit e tyre në 12 ndërmarrjet që ndodhen në kompetencat e Qeverisë. Emërimi i tyre vjen në bazë të ligjit të miratuar nga Qeveria që ndërmarrjet në kompetencë të saj të kenë zëvendësdrejtor, ndërsa partnerët e koalicionit BDI-LSDM janë marr vesh që në ndërmarrjen ku njëri subjekt ka drejtor, subjektit tjetër t’i takojë posti i zëvendësdrejtorit. Në kuadër të emërimeve, partnerët e koalicionit nuk kanë negociuar për ndarjen e drejtorive të cilët mbetën pa udhëheqës pas largimit të RDK-së nga Qeveria.
