Së paku dy persona kanë vdekur nga një zjarr që shpërtheu në një kamp refugjatësh në Greqi. Kjo ngjarje bëri që banorët e kampit të acarohen dhe të përleshen me policinë.
Një grua dhe një fëmijë vdiqën nga flakët në kampin e mbingarkuar “Moria” në ishullin e Lesbosit. Lajmin e bëri të ditur agjencia e lajmeve në Athinë, duke i cituar burimet e policisë. Trupi i gruas u dërgua në spital, ndërsa trupi i fëmijës iu dorëzua autoriteteve nga imigrantët.
Megjithatë, numri i viktimave nuk është i qartë. Një dëshmitar tha se nga zjarri kanë vdekur tre njerëz. Sipas tij, zjarri ka qenë i përhapur në gjashtë apo shtatë vendstrehime. “I gjetëm dy fëmijë tërësisht të shkrumbuar dhe një grua të vdekur. Trupat e fëmijëve ia dorëzuam brigadës së zjarrfikësve”, tha një imigrant 15 vjeç nga Afganistani.
Zjarri në këtë kamp u shua përmes helikopterit, por imigrantët reaguan me zemërim kur autoritetet erdhën për ta hetuar incidentin. Policia hodhi gaz lotsjellës për t’i shpërndarë njerëzit e grumbulluar.
Në kampin “Moria” janë të strehuar rreth 13 mijë njerëz, ndonëse është i përshtatshëm për vetëm 3 mijë persona. Agjencia për refugjatë e Kombeve të Bashkuara ka siguruar tenda për 8 mijë njerëz, ndërsa pjesa tjetër kanë ndërtuar strehimore të përkohshme nëpër fushat e ullirit.
Greqia i ka strehuar 70 mijë refugjatë, shumica sirianë, të cilët janë larguar nga vendet e tyre prej vitit 2015 për shkak të konflikteve, shkruan “The Guardian”.
