Në prani të më shumë hoxhallarëve, OH “Hilal” i ndau Myftinisë së Shkupit më 13 prill, 2020, ndihma humanitare për rajonin e Dervenit, të Karshiakës, të Karadakut dhe të Shkupit. Ndihmat janë siguruar nga donatorët “Gemak”, “Eko Sharr”, “Uka Komerc”, “6 Vëllezërit” etj.
Kryetari i Bashkësisë Fetare Islame të Republikës së Maqedonisë së Veriut, h. Sulejman ef. Rexhepi, e ka çmuar lart bashkëpunimin e subjekteve ekonomike me BFI-në dhe me OH “Hilal”, si pjesë e saj, sepse, ka thënë ai, “njerëzit sot, si kurrë më parë, kanë nevojë për ndihmë, për shkak se janë të rraskapitur nga pandemia e koronavirusit”.
Mr. Mustafa ef. Dauti, Kryetar i OH “Hilal”, ka falënderuar Kryetarin e BFI-së për ndihmën e parezervë për Organizatën Humanitare, themelues i së cilës është ai vetë, dhe ajo tani vjen në kohën e duhur për të katër rajonet e Myftinisë së Shkupit falë donatorëve, të cilët, ka thënë ai, “gjithmonë kur u kemi kërkuar, na e kanë hapur derën”. Reisi – ka thënë ai – na ka urdhëruar që në fillim t’i respektojmë vendimet e Qeverisë dhe gjithnjë të jemi të gatshëm ta japim ndihmën tonë, sidomos në këto kohë të vështira, kur tërë bota përballet me sëmundjen Covid-19.
Myftiu i Shkupit, dr. Qenan ef. Ismaili, është shprehur mirënjohës për ndihmën e ofruar nga sponsorët dhe për punën që ka bërë OH “Hilal”. “Unë jam këtu vetëm në rolin e koordinatorit të ndihmave në terren, në shpërndarjen e tyre” – ka nënvizuar ai.
Ndihmat janë me paketa ushqimore dhe higjienike dhe do t’u ndahen kategorive më të prekura sociale të Myftinisë së Shkupit, pavarësisht besimeve të tyre.
