Zëvendëskryeministri, Bujar Osmani përmes rrjetit të tij social ka përshëndetur të gjithë shqiptarët pas rezultateve të mëdha në taborin shqiptar në zgjedhjet parlamentare që u zhvilluan dje në Maqedoninë e Veriut, informon TS.
“Mirëmëngjesi vendimtar”, duke nxjerrë edhe foton me numrin 15, që sipas rezultateve të fundit nga KSHZ-ja, BDI-ja ka fituar 15 mandate deputetësh.
Ndërsa Koalicioni “Mundemi” i udhëhequr nga LSDM-ja në përbërjen e re parlamentare do të ketë 46 deputetë, koalicioni i udhëhequr nga VMRO-DPMNE-ja 44, BDI-ja 15, Aleanca për Shqiptarët dhe Alternativa 12, E Majta dy dhe PDSH-ja një deputet, tregon simulimi i Komisionit Shtetëror të Zgjedhjeve në bazë të rezultateve fillestare jozyrtare nga zgjedhjet e parakohshme parlamentare, nga 3.421 vendvotime të përpunuara nga gjithsej 3.480 vendvotime. Nëntë partitë dhe koalicionet e tjera që morën pjesë në zgjedhje nuk kanë fituar mandat deputetësh.
Koalicioni i LSDM-së ka më shumë vota 324.084 ose 36.12 për qind, përpara koalicionit të VMRO-DPMNE-së me 312.745 vota ose 34.85 për qind, BDI 101.432 ose 11.3 për qind, Aleanca për Shqiptarët dhe Alternativa 76.425 ose 8.57, E Majta 37.420 ose 4.17, ndërsa PDSH 13.563 ose 1.51 për qind./TS
