Ministria e Shëndetësisë e Arabisë Saudite ka njoftuar se asnjë pelegrin që ka marrë pjesë në haxhillëkun e këtij viti nuk është infektuar me koronavirus deri më tani.
Rituali mysliman, i cili filloi të martën dhe përfundon të dielën, zakonisht mbledh mbi dy milionë njerëz, por pas përhapjes së koronavirusit, autoritetet e Arabisë Saudite u detyruan t’ua ndalojnë haxhillëkun shtetasve të huaj këtë vit.
Shteti i përzgjodhi 1 mijë pelegrinë nga vendi por edhe të huaj që banojnë në këtë vend, në mes moshave 20 dhe 50-vjeçare dhe vendosi karantinë dyjavore para haxhillëkut, i testoi ata, u mbajti trajnime për distancë socialie dhe e vëzhgoi gjendjen e tyre, tha Dr. Abdullah Assiri, ndihmës i zëvendësministrit të Shëndetësisë.
Drejtori i përgjithshëm i Organizatës Botërore të Shëndetësisë, Tedros Adhanom Ghebreyesus, e përgëzoi Arabinë Saudite të enjten për hapat që i ka marrë për parandalimin e përhapjes së virusit, duke i cilësuar ata si “shfaqje e fuqishme e llojit të masave që shtetet mund dhe duhet t’i marrin për t’u përshtatur me normalen e re”.
Të shtunën, Arabia Saudite i regjistroi 1 mijë e 573 raste të reja të koronavirusit dhe 21 viktima, raporton CNN përcjell Klan Kosova.
Ky shtet e ka numrin më të lartë të të infektuarve ndër vendet arabe me një 277 mijë e 478 të prekur, sipas të dhënave të Ministrisë së Shëndetësisë.
