Kryetari i Kuvendit të Republikës së Maqedonisë së Veriut, Talat Xhaferi u takua me ambasadorin e Mbretërisë së Holandës, Sh.T. Dirk Jan Kop.
Kryetari shprehu mirënjohje për mbështetjen holandeze të politikës së zgjerimit të BE-së, si edhe mbështetjen e fuqishme të Republikës së Maqedonisë së Veriut në procesin e zbatimit të reformave. Ai shprehu keqardhje që gjatë kryesimit gjerman me Bashkimin Evropian nuk u tejkaluan dallimet me Bullgarinë dhe me këtë nuk u hap rruga drejt konferencës së parë ndërqeveritare.
Duke theksuar se kanalet e komunikimit mbesin të hapur dhe dialogu mes dy shteteve vazhdon, Xhaferi shprehu shpresë se në periudhën në vijim dallimet do të tejkalohen. Ai theksoi se shumica qeveritare e formuar pas zgjedhjeve në korrik, mbetet tërësisht e përkushtuar ndaj agjendës evropiane dhe vazhdon të punojë në mënyrë intensive në realizimin e të gjitha aktiviteteve për evropianizimin e vendit dhe afrimin e tij në strukturat euroatlantike.
Ambasadori Jan Kop e përuroi shtetin që në kushte të qeverisë teknike, gjendjes së jashtëzakonshme dhe pandemisë, arriti të mbajë zgjedhje fer dhe demokratike dhe të formojë Qeveri për një kohë të shkurtër. Fakti që Republika e Maqedonisë së Veriut mori dritë të gjelbër për fillimin e negociatave në mars të vitit 2020, sipas Jan Kop do të thotë se çështja e anëtarësimit të shtetit në BE nuk është nëse, por kur.
Të dy bashkëbiseduesit këmbyen mendime për zhvillimin e procesit ligjvënës në kushte të pandemisë, a e lavdëruan edhe bashkëpunimin e mirë ndërmjet dy shteteve në kuadër të NATO-s dhe organizatave ndërkombëtare parlamentare si Asambleja Parlamentare e Këshillit të Evropës, Asamblesë Parlamentare të OSBE-së dhe Unionit Inter-Parlamentar.
