Komuna e Shtimes ka pranuar gjithsej 70 vaksina Astrazeneca për COVID-19.
Ndërkohë, kryetari i Komunës Naim Ismajli, është vaksinuar i pari me arsyetim se stafi mjekësor kishte hezituar ta merrte atë. Po ashtu me këtë vaksinë është imunizuar para stafit të QKMF-së në Shtime edhe i pari i Shëndetësisë në këtë komunë Musa Baftiu.
Ismajli ka thënë se është vaksinuar me qëllim të inkurajimit të stafit dhe qytetarëve.
“Fillimisht stafi ka hezituar të marrin këtë vaksinë, andaj unë e pash të arsyeshme ta marrë i pari në mënyrë që t’i inkurajoj të tjerët. Prandaj inkurajoj të gjithë qytetarët dhe stafin që ta marrin vaksinën dhe t’i largojnë dilemat e ndryshme sepse vaksinimi është i domosdoshëm që ta ruajmë shëndetin nga ky virus”, ka thënë Ismajli.
Ndërkaq, drejtori Baftiu, ka thënë se së shpejti do të furnizohen edhe me vaksina të tjera për të moshuarit e Komunës së Shtimes.
“Ne jemi furnizuar me 70 vaksina për stafin profesional, besoj se së shpejti do të arrijnë edhe vaksinat tjera për stafin teknik dhe për moshat e shtyra mbi 80 vjeç dhe për ata me sëmundje kronike. Për momentin nuk janë vaksina të mjaftueshme, por e kemi konfirmimin se do të furnizohemi së shpejti”, ka thënë Baftiu.
