Avokatët Dublin Karaxha dhe Jasmin Kallaç, nëpërmjet një kumtese kanë dërguar demant në emër të Sedat Peker për atë se posedon pasaportë të falsifikuar me fotografinë e tij dhe me identitet tjetër.
“Duke e pasur parasysh se praktika gazetareske dhe etika gazetareske, para se të publikohet çfarëdo lajmi, duhet të kërkohet qëndrim dhe mendim edhe nga ana tjetër, që në rastin konkret nuk është respektuar. Kërkojmë që demanti nga ana e Reis Sedat Peker për këtë lajm që qarkullon në media për pasaportë të falsifikuar me fotografi të tij dhe identitet tjetër, të publikohet në tërësi në portalin tuaj, siç është rregulli dhe praktika për gazetari objektive. Reis Sedat Peker, në mënyrë kategorike i hedh poshtë të gjitha përmbajtjet e titujve dhe kronikat e transmetuara në portale dhe media, si të pavërteta dhe tendencioze. Dezinformimi i publikut, me vetëdije të qëllimshme që të prishet imazhi i zotëri Sedat Peker, shihet në atë se kronikat janë përgatitur jashtë standardeve gazetareske profesionale, kurse lajmet e transmetuara janë të rrejshme”, thuhet në kumtesë.
Nga atje, theksojnë se Reis Sedat Peker kërkon kërkim falje publike për kronikat e publikuara në të njëjtat termine dhe formate ku janë publikuar kronikat për të.
“Publikimi i këtij demanti konsiderohet si kërkim falje publike, e lexuar në tërësi dhe në formatin në të cilin janë transmetuar në të gjitha portalet. Në të kundërtën, do të ndërmarrim të gjitha mekanizmat përfshirë edhe mbrojtjen gjyqësore në drejtim të ruajtjes së integritetit, nderit dhe pasqyrës së palëve të prekura”, thuhet më tej në kumtesë.
