Shërbimi për Çështjet e Brendshme dhe Ankesat (SHÇBA) ka lëshuar urdhër-arresti për 5 policë në Qarkun e Fierit, të akuzuar për kultivim droge dhe shpërdorim detyre.
Në pranga ka rënë shefi i seksionit të krimeve në Mallakastër, Komisar E. M., nënkomisari i Policisë së Mallakastrës E. V. dhe disa inspektorë.
Pas hetimeve të kryera, në afërsi të Urës së lumit Vjosë, në Poçem të Mallakastrës, u evidentuan disa parcela të kultivuara me bimë narkotike, ngjarje për të cilën më herët janë arrestuar në flagrancë 3 shtetas.
Këta punonjës policie dyshohet se kanë shpërdoruar detyrën gjatë periudhës qershor – shtator 2021 duke lejuar, apo favorizuar veprimtarinë kriminale të disa shtetasve të arrestuar më parë nga Prokuroria e Rrethit Fier për kultivim të bimëve narkotike.
