Trupat e pajetë të civilëve në Bucha qëndruan në rrugë për javë të tëra, pavarësisht pretendimeve ruse se vrasjet ndodhën pasi trupat ishin larguar, sipas The New York Times.
Natën e kaluar u shfaqën imazhe të civilëve ukrainas të shtrirë të vdekur në rrugët e Bucha-s, me banorët që thonë se viktimat u vranë nga ushtarët rusë.
Kremlini u akuzua për “gjenocid”, por Rusia mohoi se trupat e saj vranë civilë dhe pretendoi se skenat ishin “një tjetër mashtrim”.
Një analizë para dhe pas e imazheve satelitore nga The New York Times ka treguar se shumë nga civilët u vranë më shumë se tre javë më parë, ndërkohë që forcat ruse ishin ende në rajon.
Pamjet satelitore, të cilat i janë ofruar gazetës nga Maxar Technologies, tregojnë se të paktën 11 nga ata që ishin vrarë në Bucha kishin qenë në rrugë që nga 11 marsi.
Analiza e fundit vjen pasi Pentagoni tha sot se forcat ruse ishin përgjegjëse për mizoritë në qytetin ukrainas në Bucha.
“Unë mendoj se është mjaft e qartë, jo vetëm për ne, por për botën, se forcat ruse janë përgjegjëse për mizoritë në Bucha,” – tha zëdhënësi i Pentagonit John Kirby në një konferencë shtypi.
