Një atentat me armë zjarri është regjistruar mesditën e sotme në mbikalimin e Fushë-Krujës.
Teksa më herët u raportua se dyshohej për një person të vrarë, tashmë nga vendngjarja thuhet se të vdekur kanë mbetur 3 persona.
Diklen Vata është një nga viktimat e atentatit të sotëm në Fushë Krujë.
Ai fillimisht i mbijetoi atentatit, ndërsa më pas makina që sulmoi është kthyer kur pa se ai ishte gjallë dhe doli nga makina dhe e qëlluan sërish për vdekje.
Ky është dhe momenti kur Vata është gjetur i vdekur vetëm pak metra larg makinës që shpërtheu në flakë duke djegur trupat e dy viktimave të tjerë.
Policia del me deklaratë zyrtare:
Policia ka dhënë detaje zyrtare nga ngjarja e rëndë e ndodhur këtë të diel në Fushë Krujë, ku mbetën të vdekur 3 persona.
Sipas policisë, është qëlluar me armë zjarri në drejtim të një automjeti tip “Volswagen Passat”, i cili është përfshirë nga flakët. Për pasojë, dy persona janë djegur, ndërsa një tjetër person, i identifikuar si Diklen Vata, ka arritur të dalë nga makina, por ndaj tij është qëlluar me armë dhe ka ndërruar jetë.
“Në aksin rrugor Fushë Krujë-Thumanë, te mbikalimi i Fushë Krujës, dyshohet se në drejtim të një automjeti tip “Volsëagen Passat” është qëlluar me armë zjarri.
Si pasojë automjeti ka marrë flakë dhe janë djegur në automjet dy shtetas ende të pa identifikuar.
Gjithashtu, nga të shtënat ka mbetur i vrarë dhe shtetasi D. V., 30 vjeç, nga Fushë Mamurrasi, i cili ka qenë pasagjer por ka mundur të dalë nga automjeti, dhe ka humbur jetën sapo ka dalë prej tij.
Në vendngjarje ndodhet grupi hetimor dhe forca të shumta Policie.
Nga krehja e zonës, në Larushkë, është gjetur duke u djegur një automjet tip “Volsëagen Passat” që dyshohet se është i autorëve.
Në brendësi të automjetit eshte konstatuar një armë zjarri automatike që dyshohet se është përdorur nga autori/ët për të kryer krimin.
Në ndihmë të Policisë vendore kanë shkuar grupe të FNSh Tiranë dhe janë ngritur pika kontrolli nga DVP Tiranë e Lezhë.
Grupi hetimor nën drejtimin e Prokurorisë së Rrethit Gjyqësor Krujë, po punon për identifikimin e dy shtetasve të djegur në automjet dhe për sqarimin e rrethanave të ngjarjes, sekuestrimin e cdo prove të vlefshme që do ti shërbejë zbardhjes së ngjarjes dhe identifikimit të autorëve”, njofton policia.
