Presidenti rus, Vladimir Putin do të diskutojë bashkëpunimin ushtarak dhe teknik me homologun e tij turk, Recep Tayyip Erdoğan gjatë vizitës së tij në Soçi, në Rusinë jugore të premten e ardhshme, sipas Kremlinit.
“Po, tema e bashkëpunimit ushtarak-teknik sigurisht që do të diskutohet në Soçi”, u tha gazetarëve të mërkurën zëdhënësi i Kremlinit, Dmitry Peskov.
Sipas Peskovit, bashkëpunimi ushtarako-teknik midis Rusisë dhe Turqisë është vazhdimisht në agjendë dhe “vetë fakti që ndërveprimi po zhvillohet në një zonë kaq të ndjeshme tregon se, në përgjithësi, i gjithë kompleksi i marrëdhënieve është në një nivel shumë të lartë.”
I pyetur nëse çështja e eksporteve të grurit do të ngrihet gjithashtu gjatë takimit, Peskov tha se të dy presidentët do të jenë në gjendje të vlerësojnë se si po zbatohen marrëveshjet e Stambollit për dërgesat e grurit.
“Marrëveshja tani duhet të fillojë të zbatohet, procesi do të fillojë. Kjo do të jetë një mundësi e mirë për të shkëmbyer mendime në Soçi se si kjo është në përputhje me marrëveshjet që u arritën”, tha Peskov, shkruan CNN
Putin dhe Erdogan janë takuar në Teheran javën e kaluar. Të premten, Ukraina dhe Rusia ranë dakord për një marrëveshje që do të lejonte rifillimin e eksporteve të grurit nga portet ukrainase të Detit të Zi. Marrëveshja u ndërmjetësua nga Kombet e Bashkuara dhe Turqia në Stamboll.
