Ka marrë përmasat e një lufte të vërtetë përballja e fundit mes ushtrisë izraelite dhe militantëve palestinezë.
Këtë herë trupat izraelitë kanë ndërmarrë sulme ajrore në Gaza dhe Liban për të shkatërruar bazat e krahut të armatosur të Hamasit, i cili në orët e fundit lëshoi me dhjetëra raketa në drejtim të qyteteve izraelite.
Sipas të dhënave, më shumë se 34 raketa u lëshuan në drejtim të Izraelit gjatë së enjtes nga pjesa jugore e Libanit, pjesa më e madhe e të cilave u shkatërrua nga sistemi antiraketë.
Megjithatë, disa prej tyre arritën të binin në zonat e banuara, duke shkaktuar të lënduar dhe dëme të konsiderueshme materiale.
Sipas ekspertëve të sigurisë që studiojnë përballjen mes Izraelit dhe palestinezëve, përballja e fundit konsiderohet si më e rënda mes palëve në 60 vite.
Kryeministri Netanjahu reagoi menjëherë pas këtyre sulmeve me raketa duke thënë se Izraeli do të godasë këdo që e kërcënon dhe autorët do të mbajnë përgjegjësi për veprimet e tyre.
Pasi mblodhi kabinetin e sigurisë, autoritetet izraelite nisën dhe kundërpërgjigjen. Shpërthime të fuqishme u regjistruan në Gaza, ku sipas njoftimit zyrtar u bë me dije se u shkatërruan 4 baza të Hamasit.
Bombardime pati dhe në Liban dhe pas ndërhyrjes së forcave të Kombeve të Bashkuara pati një takim me dy palëve të cilët rikonfirmuan edhe njëherë qëndrimin e Libani dhe Izraeli nuk duan luftë.
Gjithçka nisi si pasojë e tensioneve që shpërthyen disa ditë më parë, ku ushtria izraelitë ndërhyri në ambientet e xhamisë së Al Aksa për kontroll dhe u përplas me disa besimtarë që u kundërpërgjigjën me fishekzjarrë dhe mjete të forta.
Autoritetet izraelite lidhur me këtë ngjarje sigurojnë edhe njëherë besimtarët se nuk kanë asnjë qëllim që të ndryshojnë status quo-në në Malin e Tempullit.
