Kryetari i komunës së Çairit, Visar Ganiu, e ka akuzuar zv.kryeministrin e parë, Artan Grubin, se pengon investimet e qeverisë në komunën që e drejton ai. Ganiu, në një intervistë për gazetën LAJM, tha se Qeveria, në të cilën Grubi është zv.kryeministër i parë, ka investuar disa herë më shumë në komunën e Gostivarit që drejtohet nga kreu i ASH-së, Arben Taravari, se në komunën ku jeton vetë Grubi, atë të Çairit dhe që drejtohet nga BDI-ja. Sipas, Ganiut ky është një tregues i qartë se bashkëpunimi mes Grubit dhe Taravarit ka qenë shumë më i hershëm se përfshirja e ASH-së në Qeveri.
“Prej 7 vitesh që ka zv.kryeministra, dy janë prej Çairit, nuk kemi as dy million euro investime. Kjo tregon gjithçka. Në kryesi qendrore unë kam pas debat dhe prap e them nuk jam kundër pavarëisht a është komunë e ndonjë partie tjetër që e kemi oponentë, e kam cek edhe nëpër mediume, shumë më herë, më ka habitur fakti që në komunën e Gostivarit, nuk jam kundër, por kam dashur që në bazë të atyre statistikave edhe unë të jem i përfaqësuar më tepër, e kam marrë si shembull: për këto tre vite, 9 milion euro investime në komunën e Gostivarit, në komunën e Çairit 1 milion euro. Kjo tregon se ku është hileja e Artan Grubit dhe cili koalicion është bërë sot. Kjo tregon qartë përse janë bërë atje investimet për shkak se koalicionimi dhe bashkëpunimi kanë nisur shumë më herët”, tha kryetari i komunës së Çairit, Visar Ganiu, në një intervistë për gazetën LAJM.
