Ambasada e Kosovës në Maqedoninë e Veriut ka njoftuar se është nxjerrë vetura me trupat e pajetë e cila përfundoi dje në lumin Lepenc si shkak i një aksidenti.
Në njoftimin e ambasadës shprehet ngushëllim për tragjedinë, si dhe falënderohen institucionet e përfshira në rast.
“Njoftojmë opinionin e gjerë se pas një pune intensive ekipet e kërkim-shpëtimit nga Republika e Maqedonisë së Veriut dhe Republika e Kosovës kanë arritur ta lokalizojnë veturën në lumin Lepenc ku pas shumë përpjekjeve është arritur nxerrja e veturës, me trupat e pajetë në të. Ambasada e Kosovës në Shkup shpreh ngushëllimet e saja të thella për këtë tragjedi. Njëherit shprehim falënderim për të gjitha institucionet e përfshira në këtë rast”, thuhet në njoftim.
Në këtë tragjedi, mbetën të vdekur tre nga katër anëtarët e familjes Pacolli të përfshirë në aksident. Një 20-vjeçar është arritur që të shpëtohet.
Vetura u nxorr në sipërfaqe pas më shumë se 27 orësh nga aksidenti. Në aksion morën pjesë ekipe nga Maqedonia e Veriut dhe Kosova.
