Temperaturat e larta kanë shkaktuar rritje të rasteve me infeksione në fyt, veshë dhe në sistemin e tretjes. Sipas mjekëve, shkaktarët kryesorë të këtyre gjendjeve janë ushqimet e kontaminuar të cilat qëndrojnë në temperature të larta, si dhe frekuentimi i pishinave në të cilat shpesh gjinden baktere të ndryshme që prekin organet e frymëmarrjes.
“Personat të cilët shfrytëzojnë banjat publike siç janë pishinat, vijnë me infeksione të sistemit të sipërm të frymëmarrjes sidomos të fytit dhe të veshëve pasi në ujin e kontaminuar i cili mund të kontaminohet prej një njeriu të sëmurë mund të lahen me qindra ose mijëra njerëz, këto janë numra të cilat më tepër na vizitojnë kohën e fundit. Të gjitha ushqimet që janë në bazë proteinash, të gjitha pemët dhe perimet të cilat ruhen në temperature ekstreme të larta mundësojnë që të krijohen mikroorganizma të ndryshëm, dhe bukfalisht çdo ushqim është kandidat potencial apo arsye për shkaktimin e çrregullimeve shëndetësore”, deklaroi Sedat Lumani, Mjek.
Mjekët alarmojnë se shpesh herë infeksionet dinë të lënë pasoja të rënda shëndetësore, duke apeluar që të njëjtat të merren seriozisht dhe mos të lihen pas dore derisa shfaqen simptome.
“Për fat të keq, të gjithë infeksionet nuk duhet të abuzohen dhe të trajtohen si shumë normale, sepse nëse kthehemi në një retrospektivë disa vjeçare në sezonin e verës mundet që si komplikim I infeksionit të veshit ose të fytit të vijë deri në gjendje septike. Shumë shpesh ndodhin meningjiti, ndezja apo infektimi I mbështjellësve të trurit por dhe e vetë qelizave meningocefalite. Për fat të keq jo rrallë herë mbarojnë dhe në formë letale”, tha Sedat Lumani, Mjek.
Temperaturat përvëluese deri në 42 gradë Celsius do të zgjasin deri të mërkurën, ndërsa sipas parashikimeve të Entit Hidrometeorologjik nga e enjtja temperaturat do të zbresin deri në 35 gradë. Vendi vazhdon të jetë në fazën portokalli për shkak të rrezikut nga temperaturat e larta. Autoritetet shëndetësore rekomandojnë që të kihet kujdes gjatë daljes në diell, të mbahen veshmbathje më e lehtë dhe të konsumohen sa më shumë lëngje. /Alsat.mk
