Diaspora edhe këtë verë ka mirëpritur projektin MKARTË. Këtë vit dhe 68 bashkatdhetarë nga diaspora janë përzgjedhur nga Ministria e jashtme të jenë bartës të MKARTËS-s. Fidan Limani, njëri nga të përzgjedhurit për MKARTË, menaxher në bankën Sparkasse dhe zyrtar financiar në ASVO NO, si dhe këshilltar në Komunën Traisen, Austri në rrjetin social facebook ka përshëndetur projektin e Bujar Osmanit. Limani e ka cilësuar si pozitiv projektin dhe motivues për punën mëtutje.
Postimi i plotë i Fidan Limanit:
Falenderim i veçant për Ministrinë e Punëve të Jashtme të Republikës së Maqedonisë së Veriut dhe ministrit Bujar Osmani për përzgjedhjen nga qindra aplikantë në këtë proces përzgjedhjeje.
Ky vendim pozitiv më motivon të vazhdoj të punoj me institucionet e Republikës së Maqedonisë së Veriut.
Besoj se mund të kombinosh dy gjëra: Nga njëra anë, është e rëndësishme të mos harrosh rrënjët (origjinën), të njohësh origjinën, të kujdesesh për të.
Nga ana tjetër është shumë e rëndësishme të përzihesh me popullsinë e shumicës.
Sekreti i suksesit në integrim është të jeni të kujdesshëm dhe të dini saktësisht se ku qëndroni, por këtu duhet cekur se duhet shkrirë tërësisht në një rrymë tjetër të kësaj shoqërie.
Unë besoj se të dyja palët duhet të arrijnë një ekuilibër të caktuar. Atëherë ju keni një shans shumë të mirë për t’u integruar mirë.
Projekti MKARTA është konceptuar si rrjet i individëve të dalluar të diasporës jashtë vendit të cilët me angazhimin dhe përpjekjet e tyre të vazhdueshme kanë dhënë kontribut të rëndësishëm në avancimin e miqësisë, partneritetit dhe bashkëpunimit të ngushtë ndërmjet Republikës së Maqedonisë së Veriut dhe mjediseve të reja në të cilat jetojnë, kanë dhënë kontribut në avancimin e marrëdhënieve dhe bashkëpunimit të vendit tonë me diasporën si dhe kanë treguar sukses të jashtëzakonshëm në aspekt profesional.
Përveç njohjes simbolike të punës së tyre të jashtëzakonshme, me projektin forcohet lidhja e këtyre personave të dalluar me shtetin dhe hapen mundësi për bashkëpunim të shtuar dhe rolin e tyre proaktiv të institucionalizuar në Republikën e Maqedonisë së Veriut.
