Edhe pse kanë mbetur pak më shumë se tre muaj deri në fund të vitit 2023, një afat që Ministri i Transportit Boçvarski dhe Drejtori i Ndërmarrjes, Rrugët Shtetërore, Ejup Rrustemi premtuan të përfundojnë punimet në autostradën Ohër-Kërçovë, fundi nuk duket askund në horizont, shkruan Alsat.
Ka shumë më pak punëtorë, megjithëse kushtet e motit për punë ishin të shkëlqyera gjatë gjithë verës. Kryetari i Ohrit, Pecakov nuk pret që autostrada të përfundojë në dy vitet e ardhshme, dhe lëre më deri në fund të këtij viti.
“Edhe pse unë nuk jam as inxhinier dhe as i lidhur me ndërtimin e autostradave, jam i sigurt se ky minimum për dy vitet e ardhshme nuk do të shihte fundin e tij dhe me kusht që të ndryshojë pushteti, pushtet prioritetet i së cilës do të ishte autostrada, sepse ka shumë pika që nuk kanë filluar ende, dhe ka probleme në rrugë që mund të duhej të zgjidhen në fillim”, tha Kiril Pecakov, kryetar i Ohrit.
Edhe kryetari i komunës së Debërcës, Zoran Nogaçki, ku kalon pjesa më e madhe e kësaj autostrade thotë se përfundimi I projektit duket të jetë larg.
“Që nga viti 2014, tani jemi në vitin 2023, disi sikur jemi ende larg nga i gjithë projekti, jo vetëm për sa i përket vetë autostradës, por edhe për sa i përket të gjitha atyre rrugëve shërbyese që duhet të ndërtohen, dhe përveç kësaj , sepse rruga kalon nëpër vendbanime dhe krijon probleme të caktuara të infrastrukturës ekzistuese, rrjetit të ujit dhe kanalizimeve, lidhjeve, rrjedhës së sigurt të trafikut. Realiteti është se ne mezi shohim përparim atje”, u shpreh Zoran Nogaçki, kryetar i Komunës së Debërcës.
Ministri Boçvarski tha dy ditë më parë se problemet zgjidhen dhe shmangen.
“Ne do të bëjmë gjithçka, e bëjmë të gjithë koordinimin, presionet që kontraktorët të bëjnë detyrën e tyre, sepse institucionet kanë bërë detyrën e tyre. Të fillojë pjesë-pjesë të lëshohet autostrada, nga ajo që është gati. Para disa ditëve, lidhja në aeroportin e Ohrit u lëshua në përdorim, ashtu që vazhdon çdo pjesë që do të përshtatet sipas standardeve, procedurave, të jetë e sigurt dhe të lëshohet në trafik”, theksoi Blagoj Boçvarski, ministër i Transportit dhe Lidhjeve.
Boçvarski nuk specifikoi deri kur mund të përfundonte ndërtimi i autostradës./ALSAT M
