Kritika të forta nga Komisioni Europian për shkak të përmbajtjes, por edhe mënyrës si u miratuan ndryshimet në Kodin Penal. Sipas Komisionit, Maqedonia është obliguar të promovojë sundimin e ligjit dhe të luftojë pandëshkueshmërinë dhe për këtë arsye, sanksionet për aktivitetet korruptive duhet të jenë efektive dhe të përshtatshme.
“BE vëren me shqetësim se disa nga ndryshimet në Kodin Penal të miratuara në procedurë të përshpejtuar nga Kuvendi i Maqedonisë së Veriut, të cilat zvogëlojnë dënimet maksimale ligjore dhe shkaktojnë implikime për zbatimin e parimit të vjetërsisë, ndikojnë në një numër rastesh të korrupsionit të nivelit të lartë”, tha Ana Pisonero – zëdhënëse e KE.
Siç shtojnë nga Brukseli, ata shprehin keqardhje që ndryshimet nuk kishin qenë më parë subjekt i konsultimeve të gjera dhe se për miratimin e tyre është përdorur flamuri evropian. Nga ana tjetër, sipas kryeministrit Dimitar Kovaçevski, Komisioni Evropian nuk ka thënë se flamuri evropian është keqpërdorur, por vetëm se është përdorur. Duke komentuar kritikat, Kovaçevski shtoi se ndryshimet në Kodin Penal ishin për shkak të harmonizimit me legjislacionin evropian. Si shembull, ai përmendi përvojat e Gjermanisë dhe Sllovenisë.
“Nëse e krahasoni lartësinë e dënimeve, për shembull, nëse e krahasoni me Slloveninë, atëherë do të shihni se ato janë në të njëjtin nivel. Vetëm se më parë kishim një ligj në të cilin dënimet ishin, do të thosha, nga një kohë komuniste, sepse ato ishin bërë nga ai që unë e quaj Darth Vader i gjyqësorit dhe prokurorisë maqedonase, kjo nuk do të thotë se ato gjëra nuk duhet të ndryshohen”, u shpreh Dimitar Kovaçevski – Kryeministër.
Dje, ambasadorja e SHBA-së në Maqedoni Angela Ageler njoftoi se një ekip ligjor nga Ambasada do të shqyrtojë ndryshimet. Zëvendëskryeministrja Slavica Grkovska komentoi mbi këtë njoftim, duke shprehur rezerva për disa nga ndryshimet e miratuara tashmë.
“Shtetet e Bashkuara janë partneri ynë strategjik dhe do të jetë thelbësore për mua t ‘i vërej dhe komentoj këto ndryshime”, theksoi Slavica Grkovska – Zëvendëskryeministre për Qeverisje të Mirë.
Ndryshimet në Kodin Penal hyjnë zyrtarisht në fuqi nesër. Ato u miratuan shprehimisht në Kuvend me 48 vota pro. Ato u propozuan nga Qeveria, duke përdorur flamurin evropian, domethënë u futën në një procedurë të shkurtuar. Presidenti Stevo Pendarovski, i cili tashmë kishte nënshkruar dekretin për ndryshimet e reja, gjithashtu reagoi shpejt.
