Ditën e sotme në Shkup të Maqedonisë së Veriut u zhvillua takimi i liderëve të 5 vendeve anëtare të NATO-s nga Evropa Juglindore me Sekretarin e Përgjithshëm, Jens Stoltenberg.
Stoltenberg gjatë fjalës së tij u shpreh se rajoni ka rëndësi të madhe për NATO-n.
Ai theksoi se NATO nuk ka parë ndonjë rrezik të madh në vendet aleate, teksa përmendi rritjen e tensioneve në Kosovë.
“Mendoj se duhet ta kuptojmë që ndërsa ky rajon është me rëndësi shumë të madhe për NATO-n, ne nuk kemi detektuar ndonjë rrezik të madh ushtarak mbi ndonjë prej aleatëve të NATO-aleancës. Atë që shohim është rritja e tensioneve veçanërisht në Kosovë, gjithashtu shohim rritje të tensioneve në Bosnje dhe Hercegovinë. Megjithatë nuk shohim rreziqe të drejtpërdrejta ushtarake ndaj cilitdo shtet konkret. Jemi të shqetësuar lidhur me rrjedhat gjatë zhvillimeve që shkojnë në drejtim të gabuar në suazat e këtij rajoni, megjithatë në të njëjtën kohë mendoj që është e rëndësishme të theksohet, të konfirmohet dhe të dëshmohet përkatësisht mbështetet autoriteti dhe prezenca e NATO-s”, tha Stoltenberg.
Sa i përket Kosovës, ai tha se NATO ka shtuar prezencën me përafërsisht 1 mijë ushtarë.
“Në Kosovë kemi zmadhuar prezencën tonë me përafërsisht 1 mijë ushtarë dhe armatim më të rëndë. Jemi më vigjilentë dhe prej së afërmi monitorojmë situatën dhe gjithmonë do të bëjmë atë që është e nevojshme për të mbrojtur dhe për të siguruar ndihmë për aleatët tanë.
Ballkani Perëndimor është pikë shumë e rëndësishme për NATO-n. Ne jemi aleatë të rajonit. Ne kemi histori, prezencë këtu dhe kemi përgjegjësi të ndihmojmë që të sigurojmë po aq edhe prosperitet. Prandaj ky takim ishte i rëndësishëm dhe vetëm në pika të shkurtra do të përmend se po padyshim do të shqyrtoj propozimin e kryeministrit Edi Rama, të mbështetur edhe nga Presidenti i Kroacisë që ato që duhen të shqyrtojmë dhe zhvillojmë është që të takohemi në bazë më të rregullt dhe të ftojmë më tepër vende”, tha Stoltenberg.
