Meta ka konfirmuar se është duke vlerësuar se kur fjala “sionist” duhet të konsiderohet gjuhë urrejtjeje në mes të luftës mes Izraelit dhe Hamasit.
Kompania mëmë e Facebookut dhe Instagramit tha për “Washington Post” se po shqyrton zgjerimin e ndalimit për gjuhën e urrejtjes për të përfshirë më shumë përdorime të termit, veçanërisht kur zëvendëson fjalët “hebrenjtë” ose “izraelitët”.
“Duke pasur parasysh rritjen e diskursit publik të polarizuar për shkak të ngjarjeve në Lindjen e Mesme, ne besojmë se është e rëndësishme të vlerësojmë udhëzimet tona për rishikimin e postimeve që përdorin termin sionist”, ka thënë një zëdhënës i Metas.
Sipas zëdhënësit, termi “sionist” shpesh i referohet ideologjisë së një personi, e cila nuk është karakteristikë e mbrojtur, por se “mund të përdoret gjithashtu për t’iu referuar popullit hebre ose izraelit”.
Politika e Metas ndalon shënjestrimin e njerëzve bazuar në fenë ose kombësinë, që do të thotë se kompania duhet të ndalojë fjalën “sionist” kur i referohet një ideologjie ose grupi njerëzish.
