Vizita e ish-përfaqësuesit të lartë të Sekretarit të Përgjithshëm të OKB-së në Kosovë, Bernard Kouchner në Kosovë është anuluar.
“Ju njoftojmë se vizita e Dr. Bernard Kouchner në Kosovë, dhe të gjitha ngjarjet e planifikuara për datën 11 qershor 2024 janë anuluar. Vizita është anuluar për shkak të çështjeve logjistike të ndërlidhura me Dr. Kouchner. Posa të ricaktohet data e vizitës do t’ju informojmë në kohë. Ju falenderojmë për mirëkuptimin dhe bashkëpunimin tuaj”, thuhej në njoftimin e zyrës për komunikim në Komunën e Prishtinës.
Kouchneri pritej ta vizitonte Kosovën të martën dhe të mërkurën.
Ambasada e Francës kishte njoftuar se Kouchner do të pritet nga presidentja Vjosa Osmani dhe kryeministri Albin Kurti.
Atij do t’i dorëzohej “Çelësi i Qytetit” nga kryetari i Prishtinës, Përparim Rama, ndërsa do të zbulohet edhe një pllakë e një rruge të emërtuar me emrin e tij në “Rrugën B”.
Më 12 qershor Kouchneri pritej t’i drejtohet Kuvendit të Kosovës në një seancë solemne.
Kouchner ishte Përfaqësues i Lartë i Sekretarit të Përgjithshëm të OKB-së në Kosovë nga viti 1999 deri në vitin 2001 dhe ish-ministër i Punëve të Jashtme të Francës, do të vizitojë Kosovën më 11 dhe 12 qershor 2024.
