Lufta kundër korrupsionit do të jetë e pakompromistë
Koalicioni VLEN është krenar të njoftojë se për herë të parë në historinë e vendit tonë, një institucion kyç për luftën kundër korrupsionit, Drejtoria për Zbulim Financiar, do të udhëhiqet nga një kuadër shqiptar.
Kujtim Ibishi, me një biografi të pastër dhe pa asnjë njollë korrupsioni, do të udhëheqë këtë institucion të rëndësishëm për luftimin e kancerit të shoqërisë sonë – korrupsionin, larjen e parave dhe veprimtarive të tjera kriminale. Angazhimi dhe përkushtimi i tij është një garanci për një drejtim të drejtë dhe efikas të këtij institucioni.
Koalicioni VLEN ka marrë përsipër këtë përgjegjësi me vendosmëri dhe përkushtim për të udhëhequr këtë institucion kyç. Përmes Drejtorisë për Zbulim Financiar, do të punojmë intensivisht për të realizuar shtyllën tonë programore: luftimin e krimit dhe korrupsionit! Me këtë Drejtori, po rrumbullakësojmë zinxhirin e të gjitha institucioneve dhe mekanizmave për luftimin e krimit dhe korrupsionit.
Koalicioni VLEN qëndron i përkushtuar për të sjellë ndryshime pozitive dhe për të siguruar që të gjitha veprimtaritë tona të jenë në përputhje me parimet e drejtësisë dhe transparencës. Ne besojmë se me angazhimin dhe përkushtimin e duhur, do të arrijmë të luftojmë dhe të mposhtim korrupsionin në vendin tonë.
KALOJMË NË VEPRIM
