Komedianja Miranda Hart është emri i fundit në një listë të gjatë personazhesh të famshëm që kanë zbuluar se janë prekur nga sëmundja Lyme, e cila përhapet nga pickimet e rriqrave.
51-vjeçarja i bashkohet figurave të njohura si ylli i “Real Housewives of Beverly Hills” Yolanda Hadid dhe vajza e saj, modelja Bella Hadid, këngëtari Justin Bieber, aktori Ben Stiller dhe komedianja Amy Schumer, të cilët gjithashtu kanë vuajtur nga kjo sëmundje.
Ajo zbuloi në librin e saj të ri me kujtime, “Nuk kam qenë plotësisht e sinqertë me ty”, se i janë dashur mjekëve tre dekada për t’i dhënë diagnozën pas përjetimit të simptomave shqetësuese neurologjike.
Ndërkohë, modelja 26-vjeçare, Bella Hadid, e cila u diagnostikua me këtë sëmundje në vitin 2013, ka folur gjatë viteve për trajtimet e saj kundër sëmundjes Lyme. Më 6 gusht të vitit të kaluar Bella Hadid publikoi një mesazh të gjatë në Instagram ku fliste për “mos dorëzimin” ndërsa vazhdon përpjekjet për të përmirësuar shëndetin e saj.
Modelja, vëllai i saj më i vogël Anwar Hadid dhe nëna e saj Yolanda Hadid janë të gjithë të diagnostikuar me këtë sëmundje shkatërruese.
Sëmundja Lyme është një infeksion bakterial që përhapet nga rriqrat dhe shkakton simptoma të ngjashme me gripin, përfshirë lodhje, dhimbje koke, nyje të fryra dhe ethe, të cilat mund të zgjasin disa javë. Megjithatë, për arsye ende të paqarta, disa pacientë vuajnë për vite me radhë.
